Toshkent viloyati Parkent tumanida joylashgan xonadonlarning birida sherlar achinarli ahvolda boqilayotgani to‘g‘risida xabar berilgandi. Ekologiya va atrof-muhitni muhofaza qilish davlat qo‘mitasining ma’lum qilishicha, zoopitomnikda saqlanayotgan sherlarning umumiy ahvoli yaxshi.
Ma’lum qilinishicha, qo‘mita tomonidan 2019-yil 10-oktabr kuni fuqaro X.A.ga yovvoyi hayvonlar saqlanadigan va ko‘paytiriladigan pitomnik, shuningdek, zoologiya kolleksiyalarini hisobga qo‘yish to‘g‘risida guvohnoma rasmiylashtirilgan. Yovvoyi hayvonlarni saqlash va ko‘paytirish bo‘yicha Wildlife MChJ pitomnigi Toshkent viloyatining “Bog‘ishamol” dala hovli hududida joylashgan.
Pitomnik rahbari X.A. tomonidan Afrika sherlari (1 dona erkak va 1 dona urg‘ochi) 2020-yilning 3-oktabr kuni Andijon viloyatining Marhamat tumanidagi “Shou panda arena” havaskorlik sirk guruhi rahbari bilan shartnoma tuzilib, sotib olingan. Pitomnikda saqlanayotgan yovvoyi hayvonlar bo‘yicha Davlat ekologiya qo‘mitasiga 2021-yilning yanvar oyida taqdim etilgan hisobotga muvofiq, sherlar 2017-yilda tug‘ilgan, ozuqa ratsioniga go‘sht, tuxum va turli vitaminlar belgilangan. Ular o‘z vaqtida beriladi. Erkak sherning vazni 230 kilogramm, urg‘ochi sherning vazni 170 kilogramm, yovvoyi hayvonlarga emlash ishlari muddatida olib borilgan hamda ularning umumiy ahvoli yaxshi.
Shuningdek, Wildlife MChJ rahbari bilan muloqot davomida 8-sentabr kuni zoopitomnikda 1 dona bosh sher bolasi o‘ng ko‘z kataraktasi bilan tug‘ilgani hamda maxsus muolajalar o‘z vaqtida olib borilishi ma’lum bo‘ldi. Sherlarning ochiq havoda aylanishi uchun qo‘shimcha 24 metr kvadrat maydonga ega mustahkam panjarali usti berk valer tashkil etilgan.
Eslatib o‘tamiz, 2020-yilda Navoiy viloyati prokuraturasi “Mehr va oqibat” hayvonlarni himoya qilish jamiyatining murojaatiga asosan xususiy hayvonot bog‘i direktori Sohiba Barnoyevaga nisbatan hayvonlarni saqlashdagi qonunbuzarligiga oid ishni ko‘rib chiqib, 21-dekabr kuni xususiy bog‘ direktoriga nisbatan ogohlantirish e’lon qilgan va barcha kamchiliklarni bartaraf etishga besh kun muhlat bergandi. Berilgan muddat ichida qonunbuzarlik holatlari bartaraf etilmagach, ish qayta ko‘rib chiqilgan. Ushbu hayvonot bog‘ida saqlangan hayvonlar reabilitatsiya uchun Toshkentga olib kelingandi.
Izoh (0)