Koronavirus pandemiyasi tufayli dunyoda sil (tuberkulyoz) kasalligidan o‘lim darajasi oshdi. Ushbu yuqumli kasallik qurbonlari soni 1,4 milliondan 1,5 million kishiga ko‘paydi. Bu haqda Jahon sog‘liqni saqlash tashkilotining silga qarshi kurash bo‘yicha global hisobotiga tayanib, The Lancet xabar berdi.
Mutaxassislarning fikricha, o‘lim holatlarining ko‘payishi COVID-19 pandemiyasi barcha mamlakatlarda sog‘liqni saqlash tizimini zaiflashtirib, bemorlarni boshqa tibbiy xizmatlardan foydalanish imkoniyatidan mahrum qilgani bilan bog‘liq.
Ushbu fonda 2020-yilda sil tashxisi sezilarli darajada kamaygan edi. Agar bir yil oldin kasallik Yer yuzida 7,1 million odamda aniqlangan bo‘lsa, pandemiya boshlangandan so‘ng u 5,8 million kishida qayd etildi.
JSST ma’lumotlariga ko‘ra, bugungi kunda 4,1 million kishi sil bilan kasallangan. Biroq mutaxassislarning fikricha, mazkur kishilardagi kasallik tashxislanmagan yoki rasmiy hisobotlarga kiritilmagan.
JSST tahlilchilarining ma’lumotlariga ko‘ra, dunyoning 30 ta davlatida sil kasalligidan o‘lganlar soni ortgan. Shuningdek, o‘lim faqat oshib boradi. Sil kasalligi bilan bog‘liq vaziyatni barqarorlashtirish uchun kamida besh yil kerak, deyiladi xabarda.
Izoh (0)