Қалбаки ҳужжат билан ўқишга кирган спортчилар, «ПСЖ»нинг рекордини такрорлаган «Бавария» ва Сульшерни ортда қолдирган Роналду. Энг сўнгги спорт янгиликлари

Дунё ва ўзбек спортига оид 3 ноябрь кунининг энг муҳим хабарлари дайжести билан танишинг.

Ўзбекистон

2020 йилда 31 нафар спортчи қалбаки ҳужжатлар асосида олий таълим муассасаларига имтиёзли равишда қабул қилинганлиги аниқланган.

Қайд этилишича, миллий чемпионатларни ўтказиш жараёнини электронлаштириш, видео ва фото тасвирга олиш тизимли йўлга қўйилмасдан, барча ҳужжатлар қоғоз шаклида юритиб келинган. Бу эса мусобақалар натижаларини жамоатчилик учун очиқ ва шаффоф бўлишини таъминламай, айрим спорт мураббийлари томонидан мусобақа натижалари сохталаштиришига имкон яратган. Биргина 2020 йилда 31 нафар спортчи қалбаки ҳужжатлар асосида олий таълим муассасаларига имтиёзли равишда қабул қилинганлиги аниқланган.

Шу билан бирга 2021 йилда ўтказилган байдарка ва каноэда эшкак эшиш ҳамда волейбол мусобақалари натижалари бўйича ҳақиқатда ғолибликни қўлга киритмаган 7 нафар спортчига имтиёзлар тақдим этилган. Йиғилишда мазкур ҳолатлар юзасидан терговга қадар текширув ўтказилаётгани айтилди.

Ўзбекистон миллий терма жамоасининг ноябрь ойидаги йиғинида иштирок этадиган таркиби эълон қилинди

Ўзбекистон миллий терма жамоасининг 8 ноябрдан 16 ноябрга қадар ФИФА кунлари доирасида ўтказиладиган йиғинига чақирилган футболчилар маълум қилинди.

Срекчо Катанец Тошкент ва Тбилиси шаҳарларида ўтказиладиган ўқув-машғулот йиғинига 24 нафар футболчини жалб этди. Тўлиқ рўйхат билан бу ерда танишиш мумкин.

Жаҳон

Ҳужумкор ярим ҳимоячи Усмон Дембеле «Барселона»да қолмоқчи, деб ёзмоқда Diario Sport.

Маълум қилинишича, 24 ёшли француз ўз яқинларига каталонияликлар билан шартномани узайтириш истаги борлигини айтган. Ҳозирда томонлар янги келишув устида ишлаётгани айтилмоқда, музокаралар якуний босқичда.

Усмоннинг клуб билан амалдаги шартномаси ушбу мавсум охирида ўз ниҳоясига етади.

«Бавария» «ПСЖ»нинг 3 йил олдинги рекордини такрорлади

«Бавария» Чемпионлар Лигаси гуруҳ босқичининг 4-турида «Бенфика»ни 5:2 ҳисобида мағлуб этди.

Мюнхен клуби жорий мавсумда мусобақанинг тўрт ўйинида 17 та гол урди ва 2 та гол ўтказиб юборди.

Шу тариқа «Бавария» «ПСЖ»нинг 2017/18 йилги мавсумдаги рекордини такрорлади. Парижликлар ҳам ўша йили мусобақанинг дастлабки 4 ўйинида 17 та гол урганди.

Қайд этиш керак, немис клуби 3 ноябрь куни муддатидан аввал Чемпионлар Лигасининг 1/8 финалига чиқди.

Роналду «Манчестер Юнайтед» сафидаги голлар борасида Сульшердан ўзиб кетди

«Манчестер Юнайтед» ҳужумчиси Криштиану Роналду Чемпионлар Лигаси доирасидаги «Аталанта»га қарши ўйинда (2:2) иккита гол урди.

36 ёшли футболчи учун бу «Манчестер Юнайтед» сафидаги 126 ва 127-голлар бўлди. Бу кўрсаткичга эришиш учун Роналдуга 303 та ўйин керак бўлди.

«Манчестер Юнайтед» сафида урилган голлар сони бўйича португалиялик жамоа бош мураббийи Оле-Гуннар Сульшерни ортда қолдирди. Сульшер 1996—2007 йилларда 366 ўйинда 126 та гол урган.

Роналдунинг Чемпионлар Лигасидаги голлари сони эса 139 тага етди. Иккинчи ўриндаги Лионель Мессининг ҳисобида 123 та гол бор.

Варан 3—4 ҳафтага сафдан чиқди

«Манчестер Юнайтед» ҳимоячиси Рафаэл Варан Чемпионлар Лигаси гуруҳ босқичи 4-тури доирасидаги «Аталанта»га қарши ўйинда (2:2) тиззасидан жароҳат олди.

У учрашувнинг 38-дақиқасида алмаштирилди. L’Equipe’га кўра, ҳимоячининг тикланиши учун 3—4 ҳафта керак бўлади.

Вараннинг қайтиши учун оптимал сана сифатида 30 ноябрь кўрсатилмоқда. «Қизиллар» ўша куни «Арсенал»га қарши ўйин ўтказади.