Наманганда 2021 йилнинг 9 ойи давомида судланганларнинг 720 нафари ёки 26,1 фоизини такроран жиноятга қўл урган шахслар ташкил этди. Бу ҳақда вилоят суди раиси Абдурасул Эранов маълум қилди, дея хабар беради «Дарё» мухбири Азизбек Абдувалиев.
Вилоятда мазкур муддат давомида биринчи инстанция судлари томонидан 3668 нафар шахсга нисбатан 2801 та жиноят иши кўриб чиқилган. Ўтган йилнинг шу даврига нисбатан таққослаганда судланган шахслар сони 89,4 фоизга ёки 1303 нафарга, жиноят ишлари сони эса 80,9 фоизга ёки 1253 тага ортган.
«Судда кўриб чиқилган ишларни таҳлил қилганда вилоятда ўғрилик, фирибгарлик, ҳаракат хавфсизлиги қоидаларини бузиш, қасддан баданга шикаст етказиш, безорилик, ҳужжатларни сохталаштириш ва ўзлаштириш каби жиноятлар кўпайганини қайд этиш мумкин», — дейди Абдурасул Эранов.
Вилоят суди раисининг билдиришича, жорий йил февраль ойида Жиноят-процессуал кодексига янги норма киритилиб, ўзига нисбатан қўйилган гумон ёки айбловга рози бўлган, жиноятнинг очилишида фаол кўмаклашган ва келтирилган зарарни бартараф этган шахснинг прокурор билан ижтимоий хавфи катта бўлмаган, унча оғир бўлмаган ва оғир жиноятлар бўйича келишув тури жорий этилди.
Ушбу нормага мувофиқ, вилоятда судлар томонидан 2021 йил 9 ойи давомида 17 нафар шахсга нисбатан 15 та жиноят иши бўйича судланувчиларни тергов даврида прокурор билан тузган келишувлари тасдиқланиб, уларга нисбатан айбланган модда санкциясида кўзда тутилган энг кўп жазонинг ярмидан ошмаган жазо тайинланган.
Изоҳ (0)