“O‘zbekneftgaz” boshqaruvi raisining o‘rinbosari Muxtor Temirov Prezident saylovini yoritmoqchi bo‘lgan jurnalistlar uchun ajratilgan avtobusni “olib qo‘ygani”, shuningdek, “Daryo” muxbirini bo‘g‘ib, kamerasini tortib olmoqchi bo‘lgani to‘g‘risida xabar berilgandi. Kompaniya matbuot xizmati mazkur holat yuzasidan rasmiy bayonot berib, sodir bo‘lgan voqea Odob-axloq komissiyasi tomonidan o‘rganilayotganini ma’lum qildi.
Ta’kidlanishicha, maqolada keltirilgan barcha holatlar, jamiyatning bir necha nafar mas’ul xodimlarining harakatlariga nisbatan “O‘zbekneftgaz” AJ boshqaruvi raisi Mehriddin Abdullayev boshchiligida tuzilgan Odob-axloq komissiyasi tomonidan o‘rganilmoqda.
Boshqaruv raisi “O‘zbekneftgaz” AJ tarixida ilk marta xalqaro Fitch Ratings va S&P Global Ratings kabi nufuzli kompaniyalar tomonidan BB darajasidagi xalqaro kredit reytingi berilgani, transformatsiya va raqamlashtirish sohasida maqtovga arzigulik natijalarga erishilgan bir davrda bu holatni sodir bo‘lganini o‘ta og‘riqli qabul qilganini bildirgan, shuningdek, bu holat jamiyatning OAVdagi imijiga keskin salbiy ta’sir ko‘rsatganini ta’kidlagan.
Boshqaruv raisi buyrug‘i bilan jamiyat tizimidagi barcha mas’ul rahbarlarning OAV xodimlari, jurnalistlar hamda blogerlar bilan muloqot davomida avvalo hissiyotlar va taassurotlarga berilmasdan ochiqlik, oshkoralik tamoyillariga amal qilgan holda, har qanday vaziyatda ham xushmuomalalik bilan munosabatda bo‘lish belgilab qo‘yilgan.
Bundan tashqari, boshqaruv raisi “O‘zbekneftgaz” AJda faoliyat yuritayotgan barcha mas’ul rahbarlar va xodimlar O‘zbekistonning “Jurnalistlik faoliyatini himoya qilish to‘g‘risida”gi qonuniga qat’iy amal qilgan holda jurnalistning huquqlari, sha’ni va qadr-qimmatini hurmat qilishga majbur ekanini va har qanday holatda jurnalistning jurnalistlik faoliyatiga aralashishni keskin qoralashini, buning uchun lavozimidan qat’iy nazar barchaga nisbatan chora ko‘rilishini ma’lum qilgan.
Qayd etilishicha, jurnalistlar bilan bo‘lgan bu holat Odob-axloq komissiyasi tomonidan batafsil o‘rganib chiqiladi va olib borilgan o‘rganish natijalari bo‘yicha qo‘shimcha axborot taqdim etiladi.
“‘O‘zbekneftgaz’ AJ xalqaro va mahalliy OAV vakillari, blogerlar, jamoatchilik faollari bilan o‘zaro hurmatga asoslangan ikki tomonlama hamkorlik, ochiq va shaffof muloqot qilishga doimo tayyor ekanligini bildiramiz. Shuningdek, mamlakatimizda so‘z va matbuot erkinligini ta’minlash, jurnalistlarni qo‘llab-quvvatlash bo‘yicha olib borilayotgan davlat siyosatini so‘zsiz to‘la qo‘llab-quvvatlaymiz”, — deyiladi munosabatda.
Izoh (0)