Тошкент вилоятидаги «Ойбек» чегара божхона постида йирик миқдорда гиёҳвандлик воситаларининг Ўзбекистонга олиб киришга бўлган уриниш фош этилди. Бу ҳақда Давлат божхона қўмитаси матбуот хизмати «Дарё»га маълум қилди.
Маълум қилинишича, «Ойбек» чегара божхона постига кириб келган фуқаро Б.У. бошқарувидаги ДАФ русумли автомашина ўрнатилган тартибда божхона кўригидан ўтказилган. Ҳужжатларга кўра, узум ортилган автомашина республика ҳудудидан транзит тарзида ўтиб, Россияга етиб бориши лозим бўлган.
Божхоначилар инспексион кўрик мажмуаси орқали автомашинани кўздан кечириб, машина чуқурлаштирилган ҳолда божхона кўригидан ўтказилиши кераклиги тўғрисида хулосага келган. Шундан сўнг шубҳа остига олинган юк автотранспорт воситаси тезкор тузилмаларнинг махсус кузатуви остида, «Янгийўл» божхона постида ўрнатилган тартибда кўздан кечирилган.
Транспортга ортилган узумлар туширилгач, тиркаманинг пол қисми очиб кўрилган ва у ердаги яширин бўлмаларга беркитилган елим идишлар аниқланган. 141 дона елим идишларда, идиши билан ҳисоблаганда жами 156 килограммга яқин гиёҳвандлик воситалари борлиги маълум бўлган. Идишлардаги гиёҳвандлик воситаларининг ҳидини хизмат итлари пайқамаслиги учун идиш қопқоғи махсус смола — қатрон кўмагида ишлов берилган.
Ўтказилган тезкор тадбир давомида 149,76 килограмм гашиш, 4,44 килограмм опий ва 1,52 килограмм героин гиёҳвандлик воситалари ашёвий далил сифатида олинган. Ҳозирда мазкур ҳолат юзасидан жиноят иши қўзғатилган.
Аввалроқ Россияда гиёҳванд моддалар савдоси билан шуғулланган ўзбекистонлик ака-ука 6 йилга қамалгани, ДХХ ходимлари қатор вилоятларда опий ва гашиш савдоси билан шуғулланувчи наркокурьерларни қўлга олгани, Тошкент вилоятида хонадонидаги гултувакларда гиёҳвандлик воситаси етиштириб келган фуқаро ушлангани тўғрисида хабар берилганди.
Изоҳ (0)