Jinoyat ishlari bo‘yicha Xatirchi tuman sudida Navoiy kon-metallurgiya kombinati konidan rudalarni olishda ishlatiladigan portlovchi moddalar savdosi bilan shug‘ullangan shaxslarga hukm o‘qildi. Bu haqda MY5 telekanalining “Markaziy studiya” dasturida ma’lum qilindi.
Ma’lum qilinishicha, NKMK davlat korxonasi Janubiy kon boshqarmasiga qarashli “Zarmitan” konida rudalarni olish uchun lahmlarni portlatish vazifasini bajargan ikki fuqaro portlovchi moddalarni belgilangan joylarda portlatmasdan, yashirib kelgan. Ular Samarqand viloyatidagi ikki fuqaro bilan til biriktirib, portlovchi moddalar savdosi bilan shug‘ullangan vaqtida DXX tezkor guruhi tomonidan ashyoviy dalillar bilan qo‘lga olingan.
O‘tkazilgan tergov va surishtiruv ishlaridan so‘ng, ushbu fuqarolarga nisbatan sud hukmi o‘qilgan.
Sudlanuvchilarga nisbatan Jinoyat kodeksining 248, 213 va 59-moddalarining (o‘qotar qurol yoki o‘q-dorilarni beparvolik bilan saqlash, davlat organining, davlat ishtirokidagi tashkilotning yoki fuqarolar o‘zini o‘zi boshqarish organining xizmatchisini pora evaziga og‘dirib olish) tegishli bandlari asosida bir nafariga 11 yil, qolgan sheriklariga nisbatan esa 10 yil va 10 yil-u 6 oy muddatga ozodlikdan mahrum etish jazosi tayinlangan. Shuningdek, “Zarmitan” koni yer osti portlovchi moddalar omborxonasida saqlanayotgan 83 dona portlatish moddalari tegishli tartibda yo‘q qilinishi belgilangan.
Eslatib o‘tamiz, 2019-yilda “Zarmitan” tilla konidan portlovchi moddalarni olib chiqib ketishga uringan fuqaroga 3 yil NKMK DKga qarashli konlarda portlatuvchi vazifasida ishlash huquqidan mahrum qilingan va 5 yilga ozodlikdan cheklash jazosiga tayinlangan edi.
Izoh (0)