AQSh Harbiy dengiz kuchlarining USS Connecticut yadroviy suvosti kemasi 2-oktabr kuni noma’lum obyekt bilan to‘qnashgani to‘g‘risida xabar berilgandi. “Interfaks”ning yozishicha, to‘qnashuv sababchisi suvosti qoyasi bo‘lib chiqqan.
“Tekshiruv davomida USS Connecticut Hind—Tinch okeani mintaqasidagi xalqaro suvlarda o‘z vazifasini bajarayotib, xaritalarda qayd etilmagan suvosti qoyasi bilan to‘qnashuv sodir etgani aniqlandi”, — deyiladi AQSh Harbiy dengiz kuchlari xabarida.
Ta’kidlanishicha, tergov natijalari AQSh Yettinchi floti qo‘mondoni vitse-admiral Karl Tomasga ko‘rib chiqish uchun topshirilgan, u esa “keyingi harakatlar, jumladan, jinoiy javobgarlikka tortishning maqsadga muvofiqligini belgilaydi”.
Shikast yetgan suvosti kemasi 8-oktabr kuni Tinch okeanining g‘arbiy qismidagi Guam orolida joylashgan bazaga kirgan. U yerda tekshiruv o‘tkazish maqsadida harbiy mutaxassislar guruhi yetib kelgan. 28-oktabr kuni Kongressning qurolli kuchlar bo‘yicha qo‘mitasi yig‘ilishida AQSh Harbiy dengiz kuchlarining tadqiqotlar, ishlab chiqarish va xaridlar bo‘yicha vaziri o‘rinbosari Jey Stafani Guamdagi bazaning ta’mirlash imkoniyatlari cheklaganini bildirgan.
iNews’ning yozishicha, USS Connecticut suvosti kemasi orolga razvedka ishlari uchun yaqinlashgan. Bu turdagi submarinalar jangovar harakatlar o‘tkazishdan tashqari, razvedka funksiyalarini bajarishga ham mo‘ljallangan.
Shu bilan birga, ta’kidlanishicha, suvosti relyefi bilan to‘qnashish ehtimoli juda kam. Janubiy Xitoy dengizida muntazam harakatlarni amalga oshiruvchi AQSh Harbiy dengiz kuchlari bundan yaxshi xabardor. Taxminlarga ko‘ra, suvosti kemasi Xitoyga tegishli sun’iy suvosti obyekti bilan to‘qnashib ketgan bo‘lishi mumkin. Orol yaqinidagi dengiz chuqurligi 300 metrga yaqin.
AQSh Harbiy dengiz kuchlari ma’lumotlariga ko‘ra, Janubi-Xitoy dengizi akvatoriyasining xalqaro suvlarida sodir bo‘lgan to‘qnashuv oqibatida ekipajning 130 a’zosidan 11 nafariga jarohat yetgan.
Izoh (0)