AQShning Nyu-York shahrida 10 000 dan ortiq politsiya, o‘t o‘chiruvchilar va boshqa xodimlar shahar meri Bill de Blazioning barcha shahar ishchilarini COVID-19 ga qarshi emlash bo‘yicha topshirig‘iga rioya qilmagani uchun 1-noyabr kuni haq to‘lanmaydigan ta’tilga jo‘natildi. Bu haqda New York Post xabar berdi.
Nashrning yozishicha, Nyu-Yorkdagi 2,3 mingga yaqin o‘t o‘chiruvchi emlanishni istamayotgani uchun kasallik ta’tiliga chiqqan. Xodimlar yetishmovchiligi tufayli shahardagi 18 ta o‘t o‘chirish stansiyasi yopildi.
O‘t o‘chiruvchilar ularning aksariyati allaqachon COVID-19 bilan kasallanganini va tabiiy immunitetga ega ekanini, bu shahar hokimiyatining majburiy emlash to‘g‘risidagi buyrug‘ida hisobga olinmaganini ta’kidlab, ko‘plab noroziliklar o‘tkazgandan so‘ng o‘z ishlarini tark etdi.
Nyu-York meriyasi ma’lumotlarida qayd etilishicha, 1-noyabr holatiga 22,8 ming munitsipal xodim koronavirusga qarshi emlanmagan.
“Vaziyat beqarorligicha qolmoqda. Biz bo‘linmalarni xizmatga qaytarish yoki boshqa bo‘linmalarni navbatchilik uchun bu hududga ko‘chirish maqsadida xodimlarni yollayapmiz”, — deydi o‘t o‘chirish departamenti vakili Jimi Long.
20-oktabr kuni Nyu-York meri Bill de Blazio o‘t o‘chirish va politsiya xodimlari uchun majburiy vaksinatsiya e’lon qilgandi. Shahar rahbarining so‘zlariga ko‘ra, vaksinadan bosh tortganlar maoshsiz ta’tilga jo‘natiladi. Bu 1-noyabrgacha vaksinaning kamida bitta dozasini olmaganlarga tegishli.
De Blazio Twitter’da yozishicha, hali emlanmagan ishchilarning yarmidan ko‘pi imtiyozlar to‘g‘risida ariza bilan murojaat qilgan va bu so‘rovlar ko‘rib chiqilmoqda.
O‘z navbatida, o‘t o‘chiruvchilar kasaba uyushmasi vakillari merdan vaksina olish yoki olmaslik masalasini hal qilish uchun ko‘proq vaqt berishni so‘radi.
“Agar kimdir favqulodda vaziyatlarning sekin javob qaytarishi tufayli vafot etsa, bu Bill de Blazioning vijdoni va uning haddan tashqari choralari zimmasida bo‘ladi. Umid qilamanki, bu ahmoq vaziyatni imkon qadar tezroq tuzatadi”, — deb yozdi Bruklindan kongress a’zosi Nikol Malliotakis o‘zining Twitter’dagi sahifasida.
U merni emlanishni istamaganlar uchun ularning antitanalarini haftalik testdan o‘tkazgandan so‘ng xizmatda qolish imkoniyatini qaytarishga chaqirdi.
Avvalroq, 20-oktabr kuni AQSh Kasalliklarni nazorat qilish va oldini olish markazi (CDC) rahbari Roshel Valenski ilgari Yevropaning bir qancha davlatlarida aniqlangan AY4.2 — koronavirus delta shtammining yangi varianti AQShda qayd etilayotganini ma’lum qilgandi. Biroq hozirda AQShda uning yoyilishi yoki u bilan kasallanish holatlarining ko‘payishi haqida ma’lumot yo‘q.
Koronavirusning birinchi bo‘lib Buyuk Britaniyada aniqlangan yangi AY.4.2 shtammi haqidagi ma’lumotlar 19-oktabr kuni Financial Times sahifalarida paydo bo‘ldi. Ushbu mutatsiya “hindcha” shtammga nisbatan 10-15 foizga yuqumliroq bo‘lishi mumkin, deya ogohlantirdi Kembrijdagi Senger instituti hamda London universitet kollejining Genetika instituti mutaxassislari.
Isroilda ham koronavirusning ushbu yangi variantiga chalinish bilan bog‘liq birinchi holat qayd etildi.
Izoh (0)