Шавкат Мирзиёев 2022 йил Венгрияга бориши кутилмоқда. Бу ҳақда Венгрия бош вазири Виктор Орбан Президентнинг сайловда ғалаба қозонгани муносабати билан йўллаган табригида маълум қилди.
«Ҳурматли Президент жаноблари! Сизни Ўзбекистон Республикаси Президенти лавозимига қайта сайланганингиз билан муборакбод этишга ижозат бергайсиз.
2021 йил март ойида Тошкентда самарали фикр алмашганимиз ва мамлакатларимиз ўртасидаги Стратегик шериклик тўғрисидаги баёнотни имзолаганимиздан мамнунман. Туркий Кенгаш доирасидаги ҳамкорлигимиз Венгрия ва Ўзбекистон ўртасидаги дўстона муносабатларни мустаҳкамлашга янги суръат бағишлайди. Ишонтириб айтаманки, менинг ҳукуматим икки томонлама муносабатларимизни ривожлантириб боришда ҳар доимгидек қатъийдир.
Келгуси йилда Будапештда расмий ташриф доирасида Президент жаноблари билан шахсан учрашишдан умидворман ҳамда ушбу ташриф муносабатларимизни мустаҳкамлаш учун яна бир имконият бўлишига ишонаман.
Олдингизда турган масъулиятли вазифаларни рўёбга чиқаришда Сизга омад ва мустаҳкам соғлиқ тилайман!», – дейди Венгрия бош вазири қутловида.
Эслатиб ўтамиз, 2021 йил 29 март кунида Венгрия бош вазири Ўзбекистонга ташриф буюрганди. Ташриф давомида Ўзбекистон ва Венгрия савдо-иқтисодий ҳамкорликни янада кенгайтириши келишиб олинган. Икки мамлакат ўртасида стратегик шериклик тўғрисидаги қўшма декларация ва ўндан ортиқ ҳужжат имзоланган.
Изоҳ (0)