Bosh prokuratura huzuridagi Iqtisodiy jinoyatlarga qarshi kurashish departamentining Samarqand viloyat boshqarmasi tomonidan 2021-yilning 8 oyi davomida viloyat Maktabgacha ta’lim boshqarmasi tasarrufidagi maktabgacha ta’lim tashkilotlarida 24 ta holatda davlat mulkini talon-toroj qilish, poraxo‘rlik, firibgarlik va boshqa jinoyatlar sodir etilgani aniqlangan. Sodir etilgan jinoyatlarning 10 tasi, (42,7 foizi) korrupsion ko‘rinishdagi, 14 tasi (58,3 foizi) talon-toroj qilish jinoyati hisoblangan. Bu haqda “Daryo” muxbiri Farhod Norbo‘tayev xabar berdi.
Xususan, Samarqand shahridagi 126-sonli MTT direktori M.X. fuqaro M.E.ni mazkur bog‘chaga tarbiyachi vazifasiga ishga qabul qilish evaziga tashkilotga biriktirilgan shifokor orqali 300 dollarni pora tariqasida olgan vaqtda ashyoviy dalillar bilan ushlangan. Bundan tashqari, bog‘cha direktori fuqaro M.E.dan uning o‘g‘li M.A.ni tashkilotga joylashtirish evaziga 500 ming so‘m pullarni olgani aniqlangan.
Mazkur holat yuzasidan 2021-yilning 11-fevral kuni MTT direktori M.X.ga nisbatan Jinoyat kodeksining 210-moddasi (pora olish) 2-qismi “v” bandi bilan, 168-moddasi (firibgarlik) 3-qismi “v” bandi hamda shifokor K.N.ga 212-modda (pora olish-berishda vositachilik qilish) 1-qismi bilan jinoyat ishi qo‘zg‘atilgan.
Shuningdek, Bulung‘ur tumanidagi 3-sonli davlat maktabgacha ta’lim tashkiloti direktori M.A. fuqaro D.Q.ni o‘zi rahbarlik qilayotgan bog‘chaga tarbiyachi yordamchisi vazifasiga ishga qabul qilish evaziga 200 dollarni pora tariqasida olgan vaqtda ashyoviy dalillar bilan ushlangan. Holat yuzasidan 24-mart kuni M.A.ga nisbatan Jinoyat kodeksining 210-moddasi (pora olish) 1-qismi bilan jinoyat ishi qo‘zg‘atilgan.
Ta’kidlanishicha, viloyat maktabgacha ta’lim boshqarmasi tomonidan kadrlarni tanlash va tayinlashda mukammal tizimning yaratilmagani oqibatida budjetdan ajratilgan mablag‘lar talon-toroj qilingan. Buning oqibatida 2021-yilning 8 oyi mobaynida 2 milliard 712 million so‘mdan oshiq pul mablag‘lari maktabgacha ta’lim xodimlari tomonidan o‘zlashtirib yuborilgan. Ushbu toifadagi jinoyatlar Samarqand shahar va Kattaqo‘rg‘on tumanlarida ko‘p sodir etilgan.
Xususan, Kattaqo‘rg‘on tumani 43-sonli MTT mansabdor shaxslari tomonidan aslida muassasada ishlamaydigan 22 nafar fuqaro nomiga 94,2 million so‘mlik ish haqi to‘lovlari rasmiylashtirilib, talon-toroj qilingani aniqlangan.
Mazkur holat yuzasidan 21-yanvar kuni Kattaqo‘rg‘on tuman 43-son MTT mansabdor shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 2-qismi “a,g” bandlari bilan jinoyat ishi qo‘zg‘atilgan.
Bundan tashqari, Samarqand tuman maktabgacha ta’lim bo‘limi mansabdor shaxslari “Sayqal invest stil” va “Jartepa gold baraka” korxonalari rahbarlari bilan o‘zaro jinoiy til biriktirib, tumandagi 16 va 35-sonli maktabgacha ta’lim tashkilotlari binolarini haqiqatan bajarilmagan joriy ta’mirlash ishlari uchun mahalliy budjetdan ajratilgan jami 1 milliard 743 million so‘m mablag‘lardan 455,3 million so‘mini o‘zlashtirish yo‘li bilan talon-toroj qilgani aniqlangan.
Holat yuzasidan 30-mart kuni Samarqand tuman maktabgacha ta’lim bo‘limi mansabdor shaxslari va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi bilan jinoyat ishi qo‘zg‘atilgan.
Ma’lumot uchun, yuqorida aniqlangan jinoiy holatlar bo‘yicha “Daryo” muxbiri Samarqand viloyat prokuraturasi axborot xizmati bilan bog‘langan. Biroq viloyat prokuraturasi mazkur holatlar bo‘yicha ma’lumot berishni istamagan.
Avvalroq Chiroqchida bankirlar 119 nafar fuqaro nomiga rasmiylashtirilgan salkam 1 milliard so‘mni o‘zlashtirgani ma’lum bo‘lgani, Oliy va o‘rta maxsus ta’limi tizimida 9 oyda qariyb 14 milliard so‘mlik moliyaviy kamchiliklarga yo‘l qo‘ygan 21 nafar xodim ishdan olingani, Parkentda tibbiyot birlashmasi mansabdorlari 1,5 milliard so‘mdan ortiq pullarni talon-toroj qilgani to‘g‘risida xabar berilgandi.
Izoh (0)