Самарқанд боғчаларида 2021 йилнинг 8 ойида талон-торож қилиш, порахўрлик ва фирибгарлик бўйича 24 та ҳолат аниқланган

Бош прокуратура ҳузуридаги Иқтисодий жиноятларга қарши курашиш департаментининг Самарқанд вилоят бошқармаси томонидан 2021 йилнинг 8 ойи давомида вилоят Мактабгача таълим бошқармаси тасарруфидаги мактабгача таълим ташкилотларида 24 та ҳолатда давлат мулкини талон-торож қилиш, порахўрлик, фирибгарлик ва бошқа жиноятлар содир этилгани аниқланган. Содир этилган жиноятларнинг 10 таси, (42,7 фоизи) коррупцион кўринишдаги, 14 таси (58,3 фоизи) талон-торож қилиш жинояти ҳисобланган. Бу ҳақда «Дарё» мухбири Фарҳод Норбўтаев хабар берди.

Хусусан, Самарқанд шаҳридаги 126-сонли МТТ директори М.Х. фуқаро М.Э.ни мазкур боғчага тарбиячи вазифасига ишга қабул қилиш эвазига ташкилотга бириктирилган шифокор орқали 300 долларни пора тариқасида олган вақтда ашёвий далиллар билан ушланган. Бундан ташқари, боғча директори фуқаро М.Э.дан унинг ўғли М.А.ни ташкилотга жойлаштириш эвазига 500 минг сўм пулларни олгани аниқланган.

Мазкур ҳолат юзасидан 2021 йилнинг 11 февраль куни МТТ директори М.Х.га нисбатан Жиноят кодексининг 210-моддаси (пора олиш) 2-қисми «в» банди билан, 168-моддаси (фирибгарлик) 3-қисми «в» банди ҳамда шифокор К.Н.га 212-модда (пора олиш-беришда воситачилик қилиш) 1-қисми билан жиноят иши қўзғатилган.

Шунингдек, Булунғур туманидаги 3-сонли давлат мактабгача таълим ташкилоти директори М.А. фуқаро Д.Қ.ни ўзи раҳбарлик қилаётган боғчага тарбиячи ёрдамчиси вазифасига ишга қабул қилиш эвазига 200 долларни пора тариқасида олган вақтда ашёвий далиллар билан ушланган. Ҳолат юзасидан 24 март куни М.А.га нисбатан Жиноят кодексининг 210-моддаси (пора олиш) 1-қисми билан жиноят иши қўзғатилган.

Таъкидланишича, вилоят мактабгача таълим бошқармаси томонидан кадрларни танлаш ва тайинлашда мукаммал тизимнинг яратилмагани оқибатида бюджетдан ажратилган маблағлар талон-торож қилинган. Бунинг оқибатида 2021 йилнинг 8 ойи мобайнида 2 миллиард 712 миллион сўмдан ошиқ пул маблағлари мактабгача таълим ходимлари томонидан ўзлаштириб юборилган. Ушбу тоифадаги жиноятлар Самарқанд шаҳар ва Каттақўрғон туманларида кўп содир этилган.

Хусусан, Каттақўрғон тумани 43-сонли МТТ мансабдор шахслари томонидан аслида муассасада ишламайдиган 22 нафар фуқаро номига 94,2 миллион сўмлик иш ҳақи тўловлари расмийлаштирилиб, талон-торож қилингани аниқланган.

Мазкур ҳолат юзасидан 21 январь куни Каттақўрғон туман 43-сон МТТ мансабдор шахсларига нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми «а,г» бандлари билан жиноят иши қўзғатилган.

Бундан ташқари, Самарқанд туман мактабгача таълим бўлими мансабдор шахслари «Сайқал инвест стил» ва «Жартепа голд барака» корхоналари раҳбарлари билан ўзаро жиноий тил бириктириб, тумандаги 16 ва 35-сонли мактабгача таълим ташкилотлари биноларини ҳақиқатан бажарилмаган жорий таъмирлаш ишлари учун маҳаллий бюджетдан ажратилган жами 1 миллиард 743 миллион сўм маблағлардан 455,3 миллион сўмини ўзлаштириш йўли билан талон-торож қилгани аниқланган.

Ҳолат юзасидан 30 март куни Самарқанд туман мактабгача таълим бўлими мансабдор шахслари ва бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилган.

Маълумот учун, юқорида аниқланган жиноий ҳолатлар бўйича «Дарё» мухбири Самарқанд вилоят прокуратураси ахборот хизмати билан боғланган. Бироқ вилоят прокуратураси мазкур ҳолатлар бўйича маълумот беришни истамаган.

Аввалроқ Чироқчида банкирлар 119 нафар фуқаро номига расмийлаштирилган салкам 1 миллиард сўмни ўзлаштиргани маълум бўлгани, Олий ва ўрта махсус таълими тизимида 9 ойда қарийб 14 миллиард сўмлик молиявий камчиликларга йўл қўйган 21 нафар ходим ишдан олингани, Паркентда тиббиёт бирлашмаси мансабдорлари 1,5 миллиард сўмдан ортиқ пулларни талон-торож қилгани тўғрисида хабар берилганди.