O‘zbekistonda haftaning ikkinchi yarmida havo keskin soviydi

O‘zbekistonda hafta o‘rtasigacha iliqroq ob-havo bo‘ladi, haftaning ikkinchi yarmida esa havo keskin soviydi, deb xabar bermoqda “O‘zgidromet”.

Qayd etilishicha, 4-noyabr, payshanba kuni mamlakatga Ural hududlaridan sovuq va biroz nam antisiklon kirib kelib, ob-havo keskin o‘zgaradi. Shu kuni respublika bo‘yicha ba’zi joylarda yomg‘ir yog‘ishi mumkin. Tog‘li hududlarda yomg‘ir va qor ko‘rinishidagi yog‘ingarchilik bo‘ladi. Respublika shimolida yog‘ingarchilik kutilmaydi.

Harorat 4-noyabr kunduzi 3-8 daraja iliqqacha pasayadi. Bu oy boshi uchun bo‘lgan me’yoriy qiymatlardan 12-15 darajaga past.

Ba’zi joylarda shamol tezligi 15-20 metr/sekundgacha kuchayishi mumkin.

Juma, 5-noyabr kuni sovuq antisiklon mamlakatning barcha hududlarini qamrab oladi. Yog‘ingarchilik faqat ayrim tog‘li hududlarda saqlanib turadi. Havo harorati kechasi 3-5 daraja sovuqqacha, shimolda 7-10 daraja sovuqqacha pasayadi. Kunduz kuni harorat 3-8 daraja iliqdan oshmaydi.

Bundan avval “O‘zgidromet” 2-noyabr kuni kuzatiladigan ob-havo ma’lumotini e’lon qilgandi.