O‘zbekistonda oktabr oyida inflyatsiya darajasi 1,3 foizni tashkil etdi. Bu haqda Davlat statistika qo‘mitasining Iste’mol sektoridagi inflyatsiya darajasiga oid hisobotida ma’lum qilindi.
2021-yil boshidan buyon iste’mol sektoridagi narxlarning o‘sish darajasi 7,3 foizni, yillik nisbatda esa 10,6 foizni tashkil etgan. Taqqoslash uchun, 2020-yilning yanvar—oktabr oylari davomida iste’mol narxlari indeksi 7,8 foizga, 2019-yilning mos davrida esa 11,4 foizga o‘sgan.
Ma’lum qilinishicha, sentabr oyida oziq-ovqat mahsulotlari 1,9 foizga qimmatlashgan. O‘tgan yilning mos davrida esa ushbu ko‘rsatkich 2,3 foizni tashkil etgan. Shuningdek, o‘tgan yilgiga nisbatan nooziq-ovqat mahsulotlar narxining o‘sishi tezlashgan — 1,1 foiz (0,8 foiz edi). Xizmatlar narxi 0,5 foizni tashkil etdi (0,7 foiz edi).
Spot’ning yozishicha, yozgi deflyatsiyadan so‘ng narxlar o‘sishi sekin-asta tezlashgan — avgustda inflyatsiya ko‘rsatkichi 0,5 foizni, sentabrda esa 1,1 foizni tashkil etgandi. Biroq hozircha Markaziy bankning 2021-yil bo‘yicha 10 foizli darajasidagi prognozlari o‘zini oqlamoqda.
10 foiz — 2017-yildan buyon qayd etilgan eng past ko‘rsatkich. 2019-yil yakunlari bo‘yicha inflyatsiya 15,2 foizni, 2018-yilda 14,3 foizni, 2017-yilda 14,4 foizni tashkil etgan. Bunga qadar o‘nlab yillar davomida O‘zbekistonda inflyatsiya darajasi 3-5 foizni tashkil etgan, biroq ushbu raqamlar shubhali.
Izoh (0)