Namanganda sudlar tomonidan 2021-yil 9 oyi davomida korrupsiya bilan bog‘liq 221 ta jinoyat ishi ko‘rib chiqildi. Bu viloyatda shu muddat davomida ko‘rilgan jami jinoyat ishlarining 7,9 foizini tashkil etadi. Bu haqda korrupsiyaga qarshi kurashish hududiy kengashi matbuot anjumanida viloyat sudi sudyasi Jasur Qurbonov ma’lum qildi, deya xabar beradi “Daryo” muxbiri Azizbek Abduvaliyev.
Qurbonovning aytishicha, ko‘rib tamomlangan jinoyat ishlari bo‘yicha 57 kishiga ozodlikdan mahrum qilish, 62 kishiga ozodlikni cheklash, 75 kishiga jarima, 158 kishiga axloq tuzatish ishlari va 2 kishiga majburiy jamoat ishlari jazosi tayinlangan.
“Mazkur toifdagi jinoyatlarning sodir etilishi sohalari tahlili natijasiga ko‘ra, sudlanuvchilarning 37 nafarini sog‘liqni saqlash, 24 nafarini ta’lim, 16 nafarini bank, 8 nafarini qurilish, 6 nafarini hokimlik, 2 nafarini IIB, 2 nafarini Adliya va 1 nafarini MIB vakillari tashkil etgan. Tahlillardan ko‘rinib turibdiki, hisobot davrida sog‘liqni saqlash, ta’lim va bank sohasi vakillari tomonidan eng ko‘p korrupsiyaviy jinoyatlar sodir etilgan”, — deydi Jasur Qurbonov.
Ma’lumot uchun, viloyatda 9 oy davomida korrupsiya bilan bog‘liq jinoyatlar oqibatida shaxslarga nisbatan 49,7 million so‘m zarar yetkazilgan bo‘lib, bundan 30,3 million so‘mi dastlabki tergov, 2,2 million so‘mi esa sud jarayonida qoplangan. 17 million so‘mdan ortiq zararni hukm bilan undirish ko‘rsatilgan.
Izoh (0)