Angrenda “Seftriakson” sabab vafot etgan 11 yoshli qizning ota-onasi farmatsevtika kompaniyasidan noroziligini bildirdi

Toshkent viloyati Angren shahrida 11 yoshli qiz “Seftriakson” dori vositasi sabab vafot etgani haqida xabar berilgandi. “Sevimli” telekanalining “Zamon” informatsion dasturida ma’lum qilinishicha, marhumning ota-onasi Bolalar shifoxonasi ma’muriyatiga tibbiyot xodimlaridan butunlay e’tirozi yo‘qligini bildirib, tushuntirish xati yozgan.

Qizcha olib kelingan shifoxonaning jonlantirish bo‘limi shifokori Ahil Gaziyevning so‘zlariga ko‘ra, G.R. og‘ir ahvolda bo‘lgan.

“Ahvoli juda og‘ir edi, klinik o‘lim holatida olib kelingan. Bolaga reanimatsiya muolajalari qilinganidan keyin yuragi ishlab ketgan. Nafas olishi sust bo‘lgani sabab sun’iy nafas olishga o‘tkazilgan. Soat 06:55 gacha qilingan reanimatsiya muolajalari foydasini bermadi, yuragi boshqa tiklanmadi va biologik o‘lim qayd etilgan”, — deydi Gaziyev.

Qizchaning ota-onasi Bolalar shifoxonasi ma’muriyatiga tibbiyot xodimlaridan butunlay e’tirozi yo‘qligini bildirib, tushuntirish xati yozgan.

Angren shahar Bolalar shifoxonasi bosh shifokori Munavvara G‘aniyeva 11 yoshli qizchaning o‘limi bilan bog‘liq hodisa hozirda prokuratura organlari nazoratiga olinganini aytgan. Uning so‘zlariga ko‘ra, bolaga inyeksiyani onasi qilgan.

“Birinchidan, bolani inyeksiya qilgan onasida tibbiy ma’lumot yo‘q. Ikkinchidan, hech qanday shifokorga murojaat etmasdan, o‘zining xohishi bo‘yicha dorixonadan dori olib, inyeksiyani amalga oshirgan. Hattoki tibbiyot xodimlariga ham uy sharoitida tibbiy inyeksion muolajalarni amalga oshirishga ruxsat berilmagan”, — deydi u.

Shunga qaramasdan, qizchaning ota-onasi “Seftriakson” dori vositasining ma’lum partiyasi sifatsiz bo‘lsa-da, muomalaga chiqarilgan va farmatsevtika kompaniyasi qonun oldida javob bersin degan talabni qo‘ymoqda. Farmatsevtika tarmog‘ini rivojlantirish agentligi matbuot xizmati rahbari Qizlarxon Begmatova holatga izoh bergan.