Polineziya orollarining g‘arbiy qismida joylashgan Tonga orol davlati ma’muriyatining xabar berishicha, mamlakatda koronavirusga chalinish bo‘yicha birinchi holat qayd etildi. Infeksiya Yangi Zelandiyadan kelgan samolyot yo‘lovchisida aniqlangan. Bu haqda mahalliy Matangi Tonga gazetasi xabar berdi.
Tonga bosh vaziri Pogiva Tuionetoa 29-oktabr, juma kuni kasallangan yo‘lovchi karantinga olinganini ma’lum qildi. Bemor Pfizer bilan emlangan edi.
Fuaamot xalqaro aeroportining samolyot yetib kelgan vaqtda navbatchi bo‘lgan barcha xodimlari, tibbiyot va politsiya xodimlari o‘z-o‘zini yakkalashga jo‘natilgan. Samolyotdagi yo‘lovchilar, jumladan, mavsumiy ishchilar va Tonga Olimpiya terma jamoasi a’zolari ham izolyatsiyaga olingan.
Yangi Zelandiya shimoli-sharqida joylashgan Tonga 106 mingga yaqin aholiga ega. Qirollik aholisining 31 foizga yaqini to‘liq emlangan, 48 foizi esa vaksinaning birinchi dozasini olgan.
Tonga Qirolligidan tashqari, Kuk orollari, Kiribati, Mikroneziya, Nauru, Niue, Tuvalu, Pitkern orollari, Muqaddas Yelena, Tokelau orollarida ikki yildan buyon birorta ham COVID-19 ga chalinish holati qayd etilmagan.
Izoh (0)