Полинезия оролларининг ғарбий қисмида жойлашган Тонга орол давлати маъмуриятининг хабар беришича, мамлакатда коронавирусга чалиниш бўйича биринчи ҳолат қайд этилди. Инфекция Янги Зеландиядан келган самолёт йўловчисида аниқланган. Бу ҳақда маҳаллий Matangi Tonga газетаси хабар берди.
Тонга бош вазири Погива Туионетоа 29 октябрь, жума куни касалланган йўловчи карантинга олинганини маълум қилди. Бемор Pfizer билан эмланган эди.
Фуаамот халқаро аэропортининг самолёт етиб келган вақтда навбатчи бўлган барча ходимлари, тиббиёт ва полиция ходимлари ўз-ўзини яккалашга жўнатилган. Самолётдаги йўловчилар, жумладан, мавсумий ишчилар ва Тонга Олимпия терма жамоаси аъзолари ҳам изоляцияга олинган.
Янги Зеландия шимоли-шарқида жойлашган Тонга 106 мингга яқин аҳолига эга. Қироллик аҳолисининг 31 фоизга яқини тўлиқ эмланган, 48 фоизи эса вакцинанинг биринчи дозасини олган.
Тонга Қироллигидан ташқари, Кук ороллари, Кирибати, Микронезия, Науру, Ниуэ, Тувалу, Питкерн ороллари, Муқаддас Елена, Токелау оролларида икки йилдан буён бирорта ҳам COVID-19 га чалиниш ҳолати қайд этилмаган.
Изоҳ (0)