28 октябрь куни Туризм ва спорт вазирлиги ҳузуридаги Маданий мерос агентлиги ташаббуси билан биринчи марта республиканинг барча ҳудудларида «Миллий сувенирлар» фестивали ташкил этилди. Бу ҳақда «Дарё»га агентлик матбуот хизмати хабар берди.
Қайд этилишича, фестивалнинг мақсад ва вазифалари ички ва ташқи туризмни жадал ривожлантириш, мамлакат фуқаролари ва хорижлик сайёҳлар ўртасида Ўзбекистоннинг маданий-тарихий меросини кенг тарғиб қилиш, республиканинг саёҳат ва дам олиш учун хавфсиз манзил сифатидаги имижини мустаҳкамлаш борасида олиб борилаётган саъй-ҳаракатларга муносиб ҳисса қўшишдир.
Шунингдек, фестиваль иштирокчилари томонидан яратилган миллий сувенирлар савдосини йўлга қўйиш орқали республика музейлари ва маданий мерос объектларига ташриф буюрувчилар тўғридан-тўғри ушбу объектларнинг тарғиботчисига айланади. Бу эса ҳудудларни барқарор ижтимоий-иқтисодий ривожлантиришга, ҳунармандлар бандлигини таъминлашга ҳамда уларни ҳам моддий, ҳам маънавий қўллаб-қувватлашга хизмат қилади.
Фестиваль доирасида ҳунармандларнинг кўргазма-савдоси, кўрик-танловлар, маҳорат дарслари ўтказилди, шу билан бирга, фольклор-этнографик гуруҳлар ва бадиий жамоаларнинг чиқишлари ташкил этилди.
- Тошкент шаҳрида — Ўзбекистон амалий санъат ва ҳунармандчилик тарихи давлат музейи;
- Қорақалпоғистон Республикасида — Тарихи ва маданияти музейи;
- Андижон вилояти тарихи ва маданияти музейи;
- Бухоро вилоятида — «Бухоро» давлат музей-қўриқхонаси;
- Жиззах вилояти тарихи ва маданияти давлат музейи;
- Тошкент вилоятида — Ангрен шаҳар тарихи музейи;
- Фарғона вилояти тарихи ва маданияти давлат музейи;
- Хоразм вилоятида — «Ичан қалъа» давлат музей қўриқхонаси.
- Қашқадарё вилоятида — «Шаҳрисабз» давлат музей-қўриқхонаси;
- Самарқанд вилоятида — «Самарқанд» давлат музей-қўриқхонаси;
- Сурхондарё вилоятида — «Термиз» давлат музей-қўриқхонаси;
- Навоий вилояти тарихи ва маданияти давлат музейи;
- Наманган вилояти тарихи ва маданияти давлат музейи;
- Сирдарё вилояти тарихи ва маданияти давлат давлат музейларида бўлиб ўтди.
Фестивальнинг расмий очилиш ва ёпилиш маросими Ўзбекистон амалий санъат ва ҳунармандчилик тарихи давлат музейида бўлиб ўтди, шунинг баробарида «Энг яхши сувенир» номинацияси бўйича ҳар бир ҳудуд учун алоҳида 1—3 совринли ўринлар белгиланди ва ғолиблар тадбир сўнгида муносиб тақдирланди.
Эслатиб ўтамиз, тадбир Ўзбекистон Президентининг 2021 йил 9 февралдаги «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида»ги фармони асосида ўтказилди.
Изоҳ (0)