Serbiyaning Belgrad shahrida boks bo‘yicha Jahon chempionatining 4-kungi bahslari 28-oktabr, payshanba kuni bo‘lib o‘tdi.

+92 kg vazn toifasida harakat qiladigan Lazizbek Mullajonov eronlik Amiri Puriaga qarshi ringga ko‘tarildi. Dastlabki ikki raundda ustunlikka erishgan Lazizbek 4:1 hisobida ustun keldi va keyingi bosqich yo‘llanmasini hal qildi.

Mullajanov keyingi bosqichda angliyalik Delishius Oriyega qarshi bahs olib boradi.

Ma’lumot uchun, Bahodir Jalolov mazkur vazn toifasida O‘zbekistonning birinchi raqamli bokschisi hisoblanadi. Jalolov ushbu musobaqada ishtirok etmayapti.

Eslatib o‘tamiz, amaldagi jahon chempioni Mirazizbek Mizaxalilov amerikalik bokschiga mag‘lub bo‘lib, o‘z ishtirokini yakunladi, 27-oktabr kuni Shohjahon Abdullayev belgiyalik bokschiga qarshi jangda nokautga uchradi, 26-oktabr kungi bahslarda Saidjamshid Ja’farov slovakiyalik raqibi yengib, keyingi bosqich yo‘llanmasiga ega bo‘ldi, Hasanboy Do‘stmatov qozog‘istonlik raqibiga imkoniyatni boy berib, musobaqa bilan xayrlashdi. Odiljon Aslonov jangsiz 1/16 finalga yo‘l oldi. Asadxo‘ja Mo‘ydinxo‘jayev esa 25-oktabrda irlandiyalik raqibidan ustun kelgandi.