Qashqadaryo viloyati Chiroqchi tumanida Nexia’ga o‘rnatilgan gaz balloni portladi. Bu haqda YHXBB matbuot xizmati xabar qildi.
Ma’lum qilinishicha, 2021-yilning 27-oktabr kuni soat 13:30 larda Qashqadaryo viloyati, Chiroqchi tumani hududida joylashgan “Fayz” nomli choyxona binosining ro‘parasida to‘xtab turgan, 2002-yilda tug‘ilgan haydovchi I.N. boshqaruvidagi Nexia rusumli avtomobilga o‘rnatilgan gaz ballonida portlash sodir bo‘lgan.
Hodisa oqibatida haydovchi I.N. va ushbu avtomobil yo‘lovchisi, 2003-yilda tug‘ilgan Sh.S. og‘ir tan jarohatlari bilan shifoxonaga yotqizilgan.
Mazkur hodisa yuzasidan Chiroqchi tumani IIB, FVB va prokuraturasi tomonidan dastlabki surishtiruv harakatlari olib borilib, hodisa sodir bo‘lish sabablariga aniqlik kiritilmoqda.
Bundan avval Buxoroda “Volga”ning gaz balloni portlashi oqibatida ikki kishi vafot etgani, Surxondaryodagi zapravkada Lacetti’ning gaz balloni portlab ketgani hamda Toshkentda Lacetti bilan to‘qnashgan Nexia yonib ketgani haqida xabar berilgandi.
Izoh (0)