Қашқадарё вилояти Чироқчи туманида Nexia’га ўрнатилган газ баллони портлади. Бу ҳақда ЙҲХББ матбуот хизмати хабар қилди.
Маълум қилинишича, 2021 йилнинг 27 октябрь куни соат 13:30 ларда Қашқадарё вилояти, Чироқчи тумани ҳудудида жойлашган «Файз» номли чойхона биносининг рўпарасида тўхтаб турган, 2002 йилда туғилган ҳайдовчи И.Н. бошқарувидаги Nexia русумли автомобилга ўрнатилган газ баллонида портлаш содир бўлган.
Ҳодиса оқибатида ҳайдовчи И.Н. ва ушбу автомобиль йўловчиси, 2003 йилда туғилган Ш.С. оғир тан жароҳатлари билан шифохонага ётқизилган.
Мазкур ҳодиса юзасидан Чироқчи тумани ИИБ, ФВБ ва прокуратураси томонидан дастлабки суриштирув ҳаракатлари олиб борилиб, ҳодиса содир бўлиш сабабларига аниқлик киритилмоқда.
Бундан аввал Бухорода «Волга»нинг газ баллони портлаши оқибатида икки киши вафот этгани, Сурхондарёдаги заправкада Lacetti’нинг газ баллони портлаб кетгани ҳамда Тошкентда Lacetti билан тўқнашган Nexia ёниб кетгани ҳақида хабар берилганди.
Изоҳ (0)