Ombudsman nogironligi bo‘lgan shaxslarning prezident saylovlarida ishtirok etishi uchun yaratilgan sharoitlarni o‘rgandi

Oliy Majlisning Inson huquqlari bo‘yicha vakili (ombudsman) hamda Nogironlar assotsiatsiyasi vakillari 20-oktabr kuni Toshkent shahar, Mirobod va Yakkasaroy tumanlaridagi qator saylov uchastkalarida bo‘lib, u yerdagi imkoniyati cheklangan shaxslar uchun yaratilgan shart-sharoitlar holatini o‘rgandi. Bu haqda “Daryo”ga ombudsman matbuot xizmati xabar berdi.

Qayd etilishicha, o‘rganishlar davomida imkoniyati cheklangan shaxslar uchun o‘z siyosiy huquqlarini to‘laqonli amalga oshirish uchun yetarlicha sharoitlar yaratilgani, jumladan, ularga alohida kabinalar ajratilgani, kirish va chiqish joylarida panduslar joylashtirilgani, ko‘rish imkoniyati cheklanganlar uchun brayl alifbosidagi byulleten trafareti bilan ta’minlangani va saylov uchastkalariga surdo tarjimonlar jalb qilingani aniqlandi.

“Tan olish kerakki, nogironligi bo‘lgan shaxslar uchun bu yilgi saylov jarayoni oldingi yillardagidan mutlaqo yangicha tashkil etilgan. Bugungi o‘rganishlarimizda saylov uchastkalarida panduslar borligi, kar va yaxshi eshitmaydigan saylovchilar uchun surdo tarjimonlar ajratilgani, ko‘zi ojizlar uchun brayl yozuvidagi trafaretlarning qo‘yilishi bizni quvontirdi. Shu bilan birga nogironligi bo‘lgan shaxslarning ovoz berish jarayonlarida faol ishtirok etishlari uchun shart-sharoitlarni yaratish borasidagi ishlar samaradorligini yanada oshirish bo‘yicha qo‘shimcha tavsiyalar berildi”, — degan Nogironlar assotsiatsiyasi raisi Oybek Isoqov.

Xabarda aytilishicha, monitoring davomida saylov uchastkalariga qo‘yilgan panduslarni belgilangan talablarga moslashtirish, ko‘zi ojizlar uchun maxsus taktil yo‘lakchalarni tashkil etish, nomzodlar haqida audio ma’lumot olish imkoniyatini yaratish kabi tavsiyalar berildi.

Ma’lumot uchun, O‘zbekiston Konstitutsiyasining 90 va 117-moddalari va Saylov kodeksida O‘zbekistonning barcha fuqarolarining, shu jumladan, jismoniy imkoniyati cheklangan shaxslarning huquq va erkinliklari tengligi kafolatlangan.

Shuningdek, O‘zbekiston BMTning Nogironlar huquqlari to‘g‘risidagi konvensiyani ratifikatsiya qilgan bo‘lib, uning 29-moddasida ishtirokchi davlatlar nogironlarning siyosiy huquqlarini va boshqalar bilan teng ravishda foydalanish imkoniyatlarini kafolatlashi va nogironlar boshqalar bilan teng ravishda siyosiy va ijtimoiy hayotda bevosita yoki erkin saylangan vakillari orqali samarali va har taraflama ishtirok etishlari, shu jumladan, saylash va saylanish huquqlari va imkoniyatlariga ega bo‘lishlarini, jumladan, ovoz berish tartiblari, binolari va materiallari anglash va foydalanish uchun mos va oson bo‘lishini ta’minlash majburiyatlarini olishi belgilangan.