Омбудсман ногиронлиги бўлган шахсларнинг президент сайловларида иштирок этиши учун яратилган шароитларни ўрганди

Олий Мажлиснинг Инсон ҳуқуқлари бўйича вакили (омбудсман) ҳамда Ногиронлар ассоциацияси вакиллари 20 октябрь куни Тошкент шаҳар, Миробод ва Яккасарой туманларидаги қатор сайлов участкаларида бўлиб, у ердаги имконияти чекланган шахслар учун яратилган шарт-шароитлар ҳолатини ўрганди. Бу ҳақда «Дарё»га омбудсман матбуот хизмати хабар берди.

Қайд этилишича, ўрганишлар давомида имконияти чекланган шахслар учун ўз сиёсий ҳуқуқларини тўлақонли амалга ошириш учун етарлича шароитлар яратилгани, жумладан, уларга алоҳида кабиналар ажратилгани, кириш ва чиқиш жойларида пандуслар жойлаштирилгани, кўриш имконияти чекланганлар учун брайл алифбосидаги бюллетен трафарети билан таъминлангани ва сайлов участкаларига сурдо таржимонлар жалб қилингани аниқланди.

«Тан олиш керакки, ногиронлиги бўлган шахслар учун бу йилги сайлов жараёни олдинги йиллардагидан мутлақо янгича ташкил этилган. Бугунги ўрганишларимизда сайлов участкаларида пандуслар борлиги, кар ва яхши эшитмайдиган сайловчилар учун сурдо таржимонлар ажратилгани, кўзи ожизлар учун брайл ёзувидаги трафаретларнинг қўйилиши бизни қувонтирди. Шу билан бирга ногиронлиги бўлган шахсларнинг овоз бериш жараёнларида фаол иштирок этишлари учун шарт-шароитларни яратиш борасидаги ишлар самарадорлигини янада ошириш бўйича қўшимча тавсиялар берилди», — деган Ногиронлар ассоциацияси раиси Ойбек Исоқов.

Хабарда айтилишича, мониторинг давомида сайлов участкаларига қўйилган пандусларни белгиланган талабларга мослаштириш, кўзи ожизлар учун махсус тактил йўлакчаларни ташкил этиш, номзодлар ҳақида аудио маълумот олиш имкониятини яратиш каби тавсиялар берилди.

Маълумот учун, Ўзбекистон Конституциясининг 90 ва 117-моддалари ва Сайлов кодексида Ўзбекистоннинг барча фуқароларининг, шу жумладан, жисмоний имконияти чекланган шахсларнинг ҳуқуқ ва эркинликлари тенглиги кафолатланган.

Шунингдек, Ўзбекистон БМТнинг Ногиронлар ҳуқуқлари тўғрисидаги конвенцияни ратификация қилган бўлиб, унинг 29-моддасида иштирокчи давлатлар ногиронларнинг сиёсий ҳуқуқларини ва бошқалар билан тенг равишда фойдаланиш имкониятларини кафолатлаши ва ногиронлар бошқалар билан тенг равишда сиёсий ва ижтимоий ҳаётда бевосита ёки эркин сайланган вакиллари орқали самарали ва ҳар тарафлама иштирок этишлари, шу жумладан, сайлаш ва сайланиш ҳуқуқлари ва имкониятларига эга бўлишларини, жумладан, овоз бериш тартиблари, бинолари ва материаллари англаш ва фойдаланиш учун мос ва осон бўлишини таъминлаш мажбуриятларини олиши белгиланган.