Навоий вилоятида таркибида олтин зарралари бўлган тош-қумларни ноқонуний қазиб олиш билан шуғуллангани учун қўлга олинган шахс ИИБ ходимига пора беришга уринди. Бу ҳақда вилоят ИИБ ахборот хизмати хабар берди.
Маълум қилинишича, М.Б. исмли учқудуқлик фуқаро кўп бора огоҳлантирилишига қарамасдан, қонунга зид равишда таркибида олтин заррачалари бўлган тош-қумларни қазиш фаолияти билан шуғулланган. Мазкур фуқаронинг ноқонуний қилмиши Зарафшон шаҳар Ички ишлар бўлими Жиноят қидирув бўлими ходимлари ҳамда ЙҲХБ ходимлари томонидан ўтказилган тезкор рейд тадбири давомида фош этилган.
Зарафшон шаҳар йўл-патруль хизмати масканида фуқаро М.Б. бошқарувидаги Nexia русумли автомашина тўхтатиб текширилган ва машинадаги 12 дона қопга солинган, таркибида олтин заррачалари бўлган тошлар тегишли тартибда расмийлаштириб олинган.
Шундан сўнг фуқаро М.Б ўз айбини яшириш ҳамда тошларни қайта қўлга киритиш мақсадида Зарафшон шаҳар Ички ишлар бўлими ЖҚБ ходимига 300 АҚШ доллари эвазига тўпланган ҳужжатларни йўқ қилиш, судга чиқармаслик ҳамда унга қонуний чора кўрмасликни таклиф қилган. Ходим томонидан фуқаронинг бу ҳаракати қонунга зид экани бир неча бор айтилишига қарамасдан, фуқаро томонидан пора таклиф этилган.
Тезкор ходимнинг аризасига кўра, ўтказилган тадбир давомида Ички ишлар вазирлиги Шахсий хавфсизлик бош бошқармаси Навоий вилояти бўйича бўлими ходимлари томонидан фуқаро М.Б. жиноят қидирув ходимига 300 доллар миқдоридаги пулларни бераётган вақтида далилий ашёлар билан қўлга олинган.
Ҳозирда мазкур ҳолат юзасидан Жиноят кодексининг 211-моддаси (пора бериш) тегишли банди билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Жиззахда олтин рудасини ноқонуний равишда қазиб олишга уринган тўрт кишини тош босиб қолгани, Навоийда қимматбаҳо металларга эга 5 та ер участкаси сотувга қўйилгани тўғрисида хабар берилганди.
Изоҳ (0)