8-oktabr kuni Istanbul Bosh prokuraturasi chechen muxolifatchilariga qurolli hujum uyushtirishga tayyorgarlik ko‘rganlikda ayblanayotgan to‘rt nafar Rossiya, shuningdek, Ukraina va O‘zbekiston fuqarolarini hibsga oldi. Bu haqda Turkiyaning Hurriyet nashriga tayanib, Meduza xabar berdi.
Qo‘lga olingan shaxslar siyosiy va harbiy josuslikda ayblanmoqda. Bu kabi jinoyat uchun Turkiyada 15 yildan 20 yilgacha qamoq jazosi tayinlanishi mumkin. Sud ayblanuvchilarni hibsga olgan va hozirda ular Istanbuldagi Maltepe qamoqxonasida saqlanmoqda.
Hurriyet gazetasi hibsga olinganlarning ismlarini e’lon qilgan: bular Rossiya fuqarolari — Abdula Abdulayev, Ravshan Ahmedov, Bislan Rasayev va Aslanbek Abdulmuslimov, shuningdek, Ukraina fuqarosi Igor Yefrim va O‘zbekiston fuqarosi Amir Yusupov.
8-oktabr kuni CNN Turk politsiya va Turkiya Milliy razvedka tashkiloti siyosiy va harbiy josuslikda gumonlanayotgan shaxslar qo‘lga olinganini ma’lum qilgandi. Ular Istanbul va Antaliyada qurolli hujumlarni amalga oshirishda tayyorgarlik ko‘rganlikda gumonlangan. Qo‘lga olingan shaxslar yonidan Rossiya fuqarolik pasportlari topilgan, ammo hujjat haqiqiy yoki soxtaligi aniq bo‘lmagan.
Rossiya prezidentining matbuot kotibi Dmitriy Peskov 11-oktabr kuni sodir bo‘lgan voqea bo‘yicha ma’lumotga ega emasligini bildirgan. “Agarda ular rostdan ham Rossiya fuqarolari bo‘lsa, diplomatik kanallarimiz bo‘yicha biror ma’lumot olib bo‘lganmiz yoki endi olamiz. Ammo bu borada hech narsadan xabarimiz yo‘q”, — degan edi u.
Izoh (0)