Олий Мажлис Сенатининг йигирманчи ялпи мажлисида Божхона кодексининг 81 та моддасига ўзгартириш ва қўшимчалар киритиш тўғрисидаги қонун сенаторлар томонидан маъқулланди. Бу ҳақда парламент юқори палатаси матбуот хизмати хабар берди.
Таъкидланишича, мазкур қонун кейинги 2 йил ичида тадбиркорлар томонидан кўтарилаётган муаммоларнинг ечимига қаратилган. Унга кўра, қуйидаги янгиликлар жорий этилади:
- Божхона ҳужжатларининг расмийлаштириш муддати 3 кундан бир кунгача қисқармоқда;
- Товар ва транспорт воситаларини божхона режимига жойлаштириш бекор қилиняпти;
- Қайта ишлаш натижасида ҳосил бўлган товарларни божхонадан чиқариш ваколатли шахслар томонидан амалга оширилиши йўлга қўйилади (аввал божхона ўзи истаган нархни қўйиб, тадбиркорлар манфаати инобатга олинмас эди);
- Божхона тизимига ваколатли иқтисодий оператор институти жорий этилмоқда (бу божхонадаги ҳисоб-китобларда инсон омилининг аралашувини чеклайди);
- Эндиликда нафақат аэропортлар, балки мамлакатнинг тарихий шаҳарлари Самарқанд, Бухоро, Хоразм, Қўқон марказларида божсиз савдо қилувчи Duty Free дўконлари ташкил этилади.
Бундан ташқари, тизимда аппеляция кенгаши ташкил этилмоқда. У шу кунга қадар тадбиркор билан божхона ўртасидаги мавжуд низоларни судгача ҳал қилади ҳамда ортиқча оворагарчиликларнинг олди олинади. Шу каби 80 га яқин ўзгаришлар ушбу қонунда ўз аксини топган.
Эслатиб ўтамиз, 2020 йилда Ўзбекистондаги Duty Free дўконларини бошқарувчи Central Asia Меgastar МЧЖ компанияси хусусийлаштириладиган компаниялар рўйхатига тушганди. Duty Free 2018 йилда 74,2 миллиард сўм даромад, шундан 31,3 миллиард сўм соф фойда олган. 2019 йилда эса бу кўрсаткич мос равишда 87,4 миллиард ва 23,7 миллиард сўмни ташкил қилган.
Изоҳ (0)