Oliy va o‘rta maxsus ta’limi tizimida 9 oy mobaynida qariyb 14 milliard so‘mlik moliyaviy xatolik aniqlangan. Bu haqda AOKAda o‘tkazilgan matbuot anjumanida Ichki audit va moliyaviy nazorat boshqarmasi boshlig‘i Salohiddin Toshmatov ma’lum qildi.
Ma’lum qilinishicha, ushbu miqdordan 5 milliard 493,2 million so‘mlik maqsadsiz va ortiqcha xarajatlarning oldi olingan. Shuningdek, 4 milliard 979,3 million so‘mlik qismi profilaktik tadbirlar jarayonida undirilib tiklangan. 996,2 million so‘mlik qismi (ortiqcha to‘langan ish haqi va boshqa hisob-kitoblar) keyingi oylarda hisob-kitob qilish uchun undiruvga qaratilgan.
Aaniqlangan moliyaviy xato va kamchiliklarning:
- 8 milliard 35,5 million so‘m yoki 59,1 foizi ish haqi va unga tenglashtirilgan to‘lovlar hamda stipendiya to‘lovlari bo‘yicha;
- 1 milliard 111,7 million so‘m yoki 8,2 foizi tovar-moddiy qiymatliklarning kamomadi va noo‘rin hisobdan chiqarilishi bo‘yicha;
- 128 million so‘m yoki 0,9 foizi ta’mirlash ishlari uchun ortiqcha qilingan xarajatlar bo‘yicha;
- 267,1 million so‘m yoki 2 foizi ijara to‘lovi va byudjetga o‘tkazilishi lozim bo‘lgan to‘lovlar bo‘yicha;
- 4 milliard 62,9 million so‘mi yoki 29,9 foizi esa boshqa turdagi xarajat turlari hissasiga to‘g‘ri keladi.
Moliyaviy kamchiliklarga yo‘l qo‘ygan rahbar va mas’ul xodimlarning 33 nafariga nisbatan intizomiy jazo qo‘llanilib, 21 nafari lavozimidan ozod etilgan.
Avvalroq O‘zbekistonda 2019-yildan beri 50 ta bog‘chaning ta’mirlash ishlariga ajratilgan budjet mablag‘lari talon-toroj qilingani to‘g‘risida xabar berilgandi.
Izoh (0)