“O‘zbekgidroenergo” AJ o‘z faoliyatini xalqchil, oshkora hamda to‘laqonli yoritishda yurtimizda faoliyat yuritayotgan ommaviy axborot vositalari bilan yaqindan hamkorlik qilib kelmoqda. Bu borada qator bosma va elektron OAV, tele hamda radiokanallar, internet nashrlar bilan uzviy aloqalar o‘rnatilgan bo‘lib, qurilish va modernizatsiya obyektlarida maxsus media va press-turlar tashkil etilmoqda.
19-oktabr kuni OAV vakillari uchun navbatdagi media-tur tashkil qilindi. Media-turda 10 dan ortiq bosma va elektron OAV, “O‘zbekiston24” hamda “Sevimli” telekanallari, nufuzli gazetalar vakillari, bloger-jurnalistlar ishtirok etishdi.
Media-tur Toshkent viloyatida gidroenergetika sohasida yangi GESlarni qurish va mavjudlarini modernizatsiya qilish borasida so‘nggi 4 yilda amalga oshirilgan ishlar hamda sohada jadal sur’atlarda olib borilayotgan yangi investitsiyaviy yirik loyihalar, yangi gidroenergetik quvvatlar bilan tanishish maqsadida tashkil etildi.
Dastlab Chirchiq shahrida barpo etilgan, Chirchiq-Bo‘zsuv traktida joylashgan yangi “Kamolot” GESda ilk bor tajriba sifatida, “kapsula” usulida gidroagregatlar o‘rnatish yuzasidan olib borilayotgan ishlar bilan yaqindan tanishish maqsadida gidroinshoot obyektiga tashrif buyurildi.
Ushbu GESda OAV vakillari uchun “Chirchiq GESlar kaskadi” UK direktori Abdurasul Shodmonov, bosh pudratchi korxona vakili Asmandiyor Zaydullayev hamda xitoylik hamkor mutaxassislar bilan gidroinshootning texnik xarakteristikasi, gidroenergetik quvvatlari, zamonaviy standartlarga javob beradigan texnologik qurilmalari borasida intervyular tashkil etildi.
Navbatdagi manzil — “Chirchiq GESlar kaskadi” unitar korxonasi tarkibidagi Oqqovoq GES-1 (GES-10) bo‘ldi. Ushbu obyektda OAV uchun GESda olib borilayotgan modernizatsiya jarayonlari, GESning tarixi va Chirchiq ijtimoiy-iqtisodiy hayotidagi o‘rni borasida mutaxassislar tomonidan zaruriy ma’lumotlar berildi.
Media-turning keyingi obyekti “Qodiriya GESlar kaskadi” unitar korxonasi tarkibidagi GES-3 da davom ettirildi. Chirchiq-Bo‘zsuv suv-energetik traktidagi “Qodiriya GESlar kaskadi” unitar korxonasi tarkibidagi Qodiriya GES (GES-3) da olib borilgan modernizatsiya jarayonlari yakunlari hamda ushbu GES faoliyati bilan yaqindan tanishdilar. Qayd etish joizki, 1933-yilda qurilgan mazkur GESning o‘rnatilgan umumiy quvvati 13,2 MVt dan iborat. Qariyb 85 yildan buyon ishlab kelayotgan GESning 4 ta agregati ishlash quvvatini samaradorligini yo‘qotib, ta’mirga muhtoj bo‘lib qolgan edi. Modernizatsiya ishlari yakunlanganidan so‘ng, GESning umumiy quvvati 15,34 MVt ga yetkazildi. GESning yillik o‘rtacha elektr energiyasi ishlab chiqarish ko‘rsatkichi 124 million kVt/soatga yetkazildi.
Gidroenergetika sohasining taraqqiyoti mamlakatimizda elektr energiyasi ishlab chiqarish quvvatlarini oshirish bilan birga, yangi GESlar qurilayotgan, modernizatsiya qilinayotgan gidrotexnik inshootlar joylashgan hududlar aholisining turmush farovonligining oshishiga, ishlab chiqarish subyektlarining elektr quvvatlari bilan ta’minlanishiga, tom ma’noda xalqimiz farovonligini ortishiga mustahkam zamin yaratadi.
Tijoriy hamkorlik asosida
Izoh (0)