“Suriyadan kelayotgan samolyotimizga qarab turk qiruvchi samolyoti uchirilgan va Turkiya hududini tezda tark etishni talab qilgan”. Shavkat Mirziyoyev – “Mehr” operatsiyasi haqida

Prezidentlikka nomzod Shavkat Mirziyoyev Toshkent viloyatidagi saylovchilar bilan uchrashuvda “Mehr” operatsiyasi haqida gapirdi.

Toshkent viloyatidagi saylovchilar bilan uchrashuv chog‘ida “Mehr” operatsiyasi doirasida Suriyadan O‘zbekistonga qaytib kelgan ayol ham so‘z oldi va vatanga olib kelingan barcha ayollar va bolalar nomidan o‘z minnatdorligini bildirdi.

Shavkat Mirziyoyev ushbu operatsiyalarni amalga oshirish oson bo‘lmagani, ko‘p to‘siqlar va qiyinchiliklar bilan uddasidan chiqilganini ta’kidladi.

“Bir safar yurtdoshlarimizni Suriyadan olib kelayotgan samolyot Turkiya osmoni ustidan uchib o‘tayotganda bizga qarab turk harbiy havo kuchlarining qiruvchi samolyoti uchirildi va Turkiya hududini tezda tark etishni talab qildi. Keyin biz noiloj samolyotni qo‘ndirish uchun tezda boshqa joy qidirdik va eng yaqin Ozarbayjonga qo‘ndirishga ruxsat oldik.

Shundan so‘ng o‘zim shaxsan Turkiya prezidenti Erdo‘g‘on janobi oliylariga qo‘ng‘iroq qildim. Muzokaralardan keyin samolyotimiz yana uchishda davom etdi.

Garchi adashgan bo‘lishsa ham, lekin ular vatandoshlarimiz-ku. Ular uchun kim bilan bo‘lsa ham muzokara olib borishga tayyorman”, — dedi Shavkat Mirziyoyev.

Ma’lumot uchun, “Mehr” insonparvarlik operatsiyasi ilk bor 2019-yili amalga oshirilgan bo‘lib, unda 156 nafar o‘zbekistonlik, asosan, ayollar va bolalar Suriya poytaxti Damashqdan maxsus reys bilan O‘zbekistonga olib kelingan. 2019-yilning oktabr oyida esa Yaqin Sharqdagi mojarolar hududidan o‘zbekistonliklarni qaytarish bo‘yicha ikkinchi maxsus operatsiya amalga oshirilgan. 2020-yilning dekabridagi uchinchi maxsus operatsiya doirasida Suriyadan 25 nafar ayol va 73 nafar bola, 2021-yildagi “Mehr-4” operatsiyada esa 24 nafar fuqaro Afg‘onistondan O‘zbekistonga qaytarilgan. Beshinchi “Mehr” operatsiyasida 93 nafar kishi mamlakatga olib kelingan.