O‘zbekistonning amaldagi prezidenti, O‘zLiDePdan prezidentlikka nomzod Shavkat Mirziyoyev 16-oktabr kuni Toshkent viloyatidagi saylovchilar bilan uchrashuvda viloyatning qator shaharlarida “yashil maydonlar” barpo etilish taklifini bildirdi, deb xabar beradi “Daryo” muxbiri.
Shavkat Mirziyoyevning ta’kidlashicha, Olmaliq, Chirchiq, Angren, Bekobod, Ohangaron va Yangiyo‘l shaharlari hududi kengaytirilib, har birida “Yangi O‘zbekiston” uy-joy mavzelari, ijtimoiy obyektlar va “yashil maydonlar” barpo etiladi.
“Bugungi kunda Chirchiq shahrining ‘Iftixor’ mahallasida barcha zarur qulayliklar va ijtimoiy infratuzilmaga ega yangi turar joy mavzesi bunyod etilib, 2,5 ming xonadonli 39 ta ko‘p qavatli uy qurilmoqda. Keyingi bosqichda, bu yerda yana 3,5 ming oilaga mo‘ljallangan, 56 ta zamonaviy uylar barpo etiladi. Ushbu tajribani viloyatning boshqa shaharlarida ham davom ettiramiz”, — deydi davlat rahbari.
Shuningdek, Shavkat Mirziyoyev poytaxtdan bu shaharlarga 120 kilometr tezlikda yuradigan zamonaviy elektropoyezd harakati yo‘lga qo‘yilishi, buning uchun 10 ta elektropoyezd xarid qilinishi va ularda poytaxt bilan yagona bilet tizimi joriy etilishini ma’lum qilgan. Bundan tashqari, ushbu shaharlardagi 800 dan ziyod ko‘p qavatli uylarning markazlashgan issiqlik ta’minotini yaxshilashga, yarim trillion so‘m ajratiladi.
“Eng muhimi, viloyat tumanlarini o‘zaro va poytaxt bilan bog‘laydigan Jamoat transportini rivojlantirish dasturi qabul qilinadi. Dastur doirasida 20 ta yangi yo‘nalish ochiladi, 120 dan ziyod yangi bekat quriladi, 13 ta avtostansiya barpo etiladi.
Kelgusi besh yilda Toshkent viloyatida 3,5 ming kilometr avtomobil yo‘llari va 232 ta katta-kichik ko‘priklarni qurish-ta’mirlash ishlari bajarilib, bunga 4 trillion so‘m yo‘naltiramiz.
Jumladan, poytaxtdan Ulug‘bek shaharchasi orqali Chirchiqqa olib boradigan yangi avtomobil yo‘li barpo etiladi. Shuningdek, viloyat infratuzilmasini rivojlantirish jamg‘armasiga qo‘shimcha 100 million dollar ajratiladi”, — deydi Shavkat Mirziyoyev.
Avvalroq Shavkat Mirziyoyev Qarshidagi Prezident maktabiga tashrif buyurib, o‘quvchilar bilan suhbatlashgani, Bahouddin Naqshband maqbarasini ziyorat qilgani, Qorako‘ldagi Xalqaro matematika maktabini borib ko‘rgani to‘g‘risida xabarlar berilgandi.
Izoh (0)