O‘zLiDePdan prezidentlikka nomzod Shavkat Mirziyoyev Toshkent viloyatida saylovchilar bilan uchrashuvda viloyatning turizm salohiyatini rivojlantirish borasidagi takliflari bilan bo‘lishdi, deb xabar beradi “Daryo” muxbiri.
Davlat rahbarining so‘zlariga ko‘ra, O‘zbekistonda qishki va yozgi turizm uchun cheksiz imkoniyatga ega bo‘lgan eng qulay hudud – Toshkent viloyati hisoblanadi.
“Birgina misolga ahamiyat bering, poytaxtning o‘zidan viloyatga haftasiga 200-250 ming nafar aholi chiqadi, bu oyiga – qariyb 400 milliard so‘mlik tushum degani. Shu bois viloyatda turizm salohiyatini yangi bosqichga olib chiqish bo‘yicha alohida dasturni amalga oshiramiz. Avvalambor, Amirsoy va Chimyon turistik majmualarida, Chorvoq suv ombori va Toshkent dengizi atrofida, Ohangaron, Angrendagi tog‘li hududlarda qo‘shimcha turistik zonalar va dam olish maskanlari barpo etilishiga 1 milliard dollar investitsiyalar jalb etilib, 80 ming ish o‘rinlari yaratiladi”, — deydi Shavkar Mirziyoyev.
Davlat rahbari Parkent tumanini turizm markazi aylantirish maqsadida qator takliflarni ham sanab o‘tgan:
- “Yangi O‘zbekiston” bog‘idan Parkentning so‘lim go‘shalariga eltuvchi 30 kilometr uzunlikdagi yangi magistral yo‘l quriladi;
- Toshkent shahridan Parkentga tezyurar avtobuslar qatnovi tashkil etiladi;
- tuman infratuzilmasiga 100 milliard so‘m ajratiladi;
- tumanda turizm uchun maxsus soliq rejimi joriy qilinadi. Bunda tadbirkorlar uch yil davomida aylanmadan olinadigan soliq va ijtimoiy soliqni 1 foiz stavkada, mol-mulk, yer, suv soliqlarini hisoblangan summadan bor yo‘g‘i 1 foizini to‘laydi;
- yo‘l bo‘ylarida savdo, umumiy ovqatlanish va xizmat ko‘rsatish obyektlari barpo etilib, kamida 3 mingta yangi ish o‘rni tashkil etiladi.
Avvalroq Aydarko‘l atrofida yangi turistik hududlar, sog‘lomlashtirish maskanlari qurilishi, O‘zbekiston The Times versiyasi bo‘yicha dunyoning eng go‘zal maskanlari qatoridan o‘rin olgani to‘g‘risida xabar berilgandi.
Izoh (0)