Energetika vazirligi shtabi tomonidan Namangandagi “To‘raqo‘rg‘on asfalt sanoat” MChJga qarashli asfalt ishlab chiqarish korxonasining tabiiy gazdan foydalanish holati tekshirildi. Bu haqda vazirlik matbuot xizmati xabar berdi.
Tekshiruv jarayonida korxona tomonidan tabiiy gazdan foydalanish uchun gaz ta’minoti tashkiloti bilan tabiiy gaz yetkazib berish shartnomasi tuzilmagani va ushbu iste’molchi “Hududgaz Namangan” gaz ta’minoti filialining FOSSA dasturida mavjud emasligi ma’lum bo‘lgan.
Olib borilgan hisob-kitoblarga ko‘ra, mazkur korxona tomonidan 97 ming 412 kub metr tabiiy gazdan noqonuniy ravishda foydalanilgan. Buning natijasida gaz ta’minoti korxonasiga yetkazilgan zarar miqdori 97 million 412 ming so‘mni tashkil etgan.
Ta’kidlanishicha, ushbu hajmdagi tabiiy gaz qariyb 10 mingta xonadonning 1 kunlik iste’molini tashkil qiladi. Holat yuzasidan to‘plangan hujjatlar Namangan viloyati prokuraturasiga taqdim etilgan.
Avvalroq Energetika vazirligi O‘zbekistonda 2021-yil boshidan buyon qariyb 78 mlrd so‘mlik gaz o‘g‘irlanganini ma’lum qilgandi.
Izoh (0)