O‘zbekiston Respublikasi mudofaasiga ko‘maklashuvchi “Vatanparvar” tashkiloti rahbari Husan Botirov “Daryo” muxbiri bilan suhbatda yo‘llarda bo‘layotgan yo‘l-transport hodisalarining asosiy sababchisi haydovchi ekanligiga urg‘u berib o‘tdi.
“Yo‘llar qanday sharoitda bo‘lishidan qat’i nazar – yo‘l buzuq bo‘lsa ham, agar haydovchi o‘qigan, qonunni biladigan va texnikasini avaylaydigan kishi bo‘lsa, o‘sha yerda vaziyatga to‘g‘ri baho berib, holatdan omon chiqib ketadi. Agar odam haydovchilikni o‘zlashtirgan, o‘qish davrida yo‘l harakati qoidalari va belgilarini mukammal o‘rgangan bo‘lsa, u albatta belgilarning qo‘yilgan joyiga qarab to‘g‘ri yoki noto‘g‘ri ekanligini anglaydi. To‘g‘ri, yo‘lning notekisligi, nosozligi yo‘l-transport hodisasi sodir bo‘lishining ikkinchi omili. Lekin transport hodisasini yo‘l sodir qilmayapti-ku, odam sodir qilyapti, avtomobilni boshqarayotgan odam. Bunga o‘sha sharoitda ikkita sabab bo‘lishi mumkin. Demak, o‘sha joydan bexabar odam bo‘lsa, ma’lum bir tezlikda kelib qolgan bo‘lsa, o‘zini xavfdan olib qolish uchun ham qurbonga aylanishi mumkin. Bu katta ko‘chalarda, shaharlar o‘rtasida, viloyatlar, katta trassalarda bo‘lishiga ba’zilar ishonadi. Yo‘lning buzuq qismini bir metr qolganda ko‘rmaydi-ku? O‘zidan oldin avtomobil ketayotgan bo‘lsa, uning harakatiga qarab holatni aniqlasa bo‘ladi. Tunda bo‘lmasa yo‘lning buzuq qismini kamida o‘sha 20-30 metr masofada ko‘rish mumkin. Mabodo tunda bo‘lsa va aholi yashash punktida yurgan bo‘lsa, soatiga 50 kilometr tezlikdan oshirmay tormozni bossa, oshib borsa balloni yorilar, g‘ildiragi ishdan chiqar, lekin mashina soz, odam sog‘ qoladi”, – dedi “Vatanparvar” tashkiloti rahbari.
Suhbat davomida Husan Botirov yo‘llar notekisligi, belgilarning noto‘g‘ri o‘rnatilganligi yoki ikkinchi ishtirokchining xatosi bilan YTH sodir bo‘lishi mumkinligi haqidagi savolga javob berdi..
“Afsuski, ikkinchi tomonning aybi bilan bo‘ladigan transport vositalari – juda katta xavf tug‘diradigan omillardan, deb o‘ylayman. Masalan, bir holatni olaylik: siz bevosita yo‘l harakati qoidalariga amal qilib kelayotib piyoda o‘tayotgan joyda avtomobilingizni to‘xtatganingizda orqangizdan boshqa haydovchi kelib urishi ham mumkin. Natijada avtomobilingizga yoki boshqa bir piyodaga zarar yetishi mumkin. Qanaqasiga aylantirsangiz ham inson omili – asosiy sabab hisoblanadi”, – dedi “Vatanparvar” tashkiloti rahbari.
Husan Botirovning fikricha, YTHni faqatgina o‘qimaganlar emas, balki o‘qiganlar ham sodir qiladi.
“O‘qiganlarning qaysilari sodir qiladi, degan savolga men shunday javob bergan bo‘lar edim: o‘qib turib o‘ziga haddan ortiq baho bergan, har qanday vaziyatni boshqara olaman deb o‘ylaydigan va bir vaqtning o‘zida o‘zini shu xatti-harakati bilan to‘g‘ri huquqiy baho beradigan bo‘lsak, qonunlarni mensimayotgan odamlar yo‘l hodisalari sababchisi bo‘ladi” , – dedi u.
Avvalroq Husan Botirov pulga sotilayotgan “prava”lar haqidagi savolga javob berar ekan, kimdir ishi, o‘qishi yoki boshqa sabablarga bog‘liq holda avtomaktabda o‘qimay “Mana, sizga o‘sha o‘qishga ketadigan mablag‘, imtihondan o‘tkazib bersangiz bo‘ldi” deb murojaat qiladiganlar borligini ta’kidlab o‘tgan edi.
Izoh (0)