O‘zbekistonga ilk bor ko‘chma mobil PZR laboratoriyasi olib kelindi, deb xabar beradi SSV matbuot xizmati. U bir sutkada 1,5 ming kishida koronavirusga PZR tekshiruvini amalga oshirish imkonini beradi.
Ko‘chma mobil laboratoriya 2020-yilda Germaniya xalqaro hamkorlik jamiyati va OPASCA GmbH ko‘magidagi “Germaniya hukumatining O‘zbekiston sog‘liqni saqlash tizimiga texnik va tashkiliy yordami” loyihasi doirasida mamlakatga keltirilgan.
“Hozirgi kunda mamlakatimizning turli hududlarida 200 ga yaqin turg‘un PZR laboratoriyalari mavjud. Ammo bu chekka va olis hududlar aholisini to‘liq qamrab olishda ba’zi muammolarni yuzaga keltirayotgandi. Shu bois bugun keltirilgan ko‘chma mobil PZR laboratoriyasi va emlash punkti yurtimizning istalgan hududiga borib, koronavirus tahlillarini o‘tkazish imkonini beradi. Yana bir ahamiyatli jihati, mazkur zamonaviy texnika vositalari yordamida PZR testi natijalarini 1 soat muddatda olish mumkin”, — deydi Respublika Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyev.
Ta’kidlanishicha, ushbu laboratoriya elektr energiyasi bo‘lmagan vaziyatlarda ham 6 soatgacha xizmat ko‘rsata oladi. Haydovchi va 3 nafar tibbiyot xodimi faoliyati uchun to‘liq moslashtirilgan. Ularning dam olishi, ovqatlanishi, yuvinishi va boshqa ehtiyojlari uchun zarur sharoitlarga ega.
Mobil PZR laboratoriyasi dastlabki faoliyatini Samarqand viloyatining chekka va aholi soni ko‘p bo‘lgan hududlaridan boshlashi kutilmoqda. Fuqarolar mazkur laboratoriyada koronavirusga bepul test topshiradi.
Izoh (0)