IIV YHXBB ijtimoiy tarmoqlarda tarqalgan Toshkentdagi ko‘chalardan biri bo‘ylab xavfli manyovrlarni bajargan holda harakatlangan Lacetti videosi bo‘yicha ma’lumot berdi.
Ijtimoiy tarmoqlarda Yunusobod tumanida Lacetti avtomobili orqamacha harakatlanayotgani tasvirlangan video tarqaldi.
Idora matbuot xizmatining ma’lum qilishicha, videodagi holat 4-sentabr kuni soat 22:50 larda Yunusobod tumani Alisher Navoiy ko‘chasida sodir bo‘lgan. 30 yoshli J.K. Lacetti avtomobilida xavfli manyovrlar bilan, ruxsat etilmagan bo‘lsa-da transport vositasiga yalt-yalt yonuvchi mayoqchalar o‘rnatgan holda harakatlangan. Ta’kidlanishicha, haydovchi ushbu qoidabuzarlik sodir etilgan ko‘chada xizmat olib borgan YPX xodimi Z.Ahmadjonov tomonidan to‘xtatilgan.
Tekshiruv davomida avtomobil yon oynalarining tusi tegishli ruxsatnomasiz qoraytirilgani ham aniqlangan. Haydovchi YPX xodimining qonuniy talablarini bajarmagan.
Unga nisbatan Ma’muriy javobgarlik to‘g‘risidagi kodeksning 126-(ko‘zgusimon va tusi o‘zgartirilgan oynali, shuningdek, tevarak-atrofni ko‘rishni cheklaydigan qoplamali transport vositalaridan foydalanish), 128-(transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi), 135-(yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) hamda 194-moddalari (ichki ishlar xodimining qonuniy talablarini bajarmaslik) tartibida ma’muriy bayonnoma rasmiylashtirilgan va avtomobil vaqtincha saqlash uchun jarima maydoniga qo‘yilgan.
Avvalroq Toshkentda Spark ustida sherigini bog‘lab, TikTok’ka rolik suratga olgan blogerlar 10 sutkaga qamalgani, Toshkentda YPX xodimiga bo‘ysunmay, “bor, yo‘qol” deb yo‘lida davom etgan haydovchining Equinox’i jarima maydonchasiga joylashtirilgani, Toshkentda yo‘lning qatnov qismida drift qilgan haydovchiga chora ko‘rilgani to‘g‘risida xabar berilgandi.
Izoh (0)