BMTning Qochqinlar ishi bo‘yicha boshqarmasi Afg‘oniston uchun gumanitar yordam ortilgan 3 ta samolyotni Termizga yuborishni rejalashtirmoqda. Bu haqda tashkilot matbuot xizmati xabar berdi.
Qayd etilishicha, ushbu gumanitar yordam yuk mashinalariga ortilib Termizdan Hayraton chegara punkti orqali Afg‘onistonning Mozori-Sharif shahriga yetkaziladi. Shunday samolyotlarning birinchisi Termizga oktabr oyining o‘rtalarida yuboriladi.
Kobulda bo‘lib turgan BMTning Qochqinlar ishi bo‘yicha boshqarmasi vakili Babar Baloxning ma’lum qilishicha, boshqarma Afg‘oniston bilan chegaradosh davlatlarda logistik markazlarni tashkil etish ustida ish olib bormoqda. Ular orqali Afg‘onistondagi 100 minglab ichki ko‘chmanchilarga favqulodda yordam ko‘rsatiladi.
“Kechalari havo sovuqlashmoqda va bosh-panasiz qolgan odamlarga tezkor yordam zarur”, — deb ta’kidlagan Balox. Uning so‘zlariga ko‘ra, yordamga muhtoj afg‘onlar soni 20 million kishiga yetdi va kundan-kunga oshib bormoqda.
“BMT Afg‘onistondagi gumanitar operatsiyalar uchun 606 million dollar so‘raganiga 1 oy bo‘ldi, ammo hozircha uning 35 foizi yig‘ildi. Mablag‘lar Afg‘oniston iqtisodiyotining to‘liq inqirozining oldini olish uchun zarur”, — deya eslatib o‘tgan BMT bosh kotibi Antoniu Guterrish.
Avvalroq BMT Afg‘onistonga yordam ko‘rsatish uchun O‘zbekistonda asosiy logistika markazini ochgani haqida xabar berilgan edi.
Izoh (0)