“Litsenziyalash, ruxsat berish va xabardor qilish tartib-taomillari to‘g‘risida”gi qonun qabul qilingani munosabati bilan O‘zbekistonning ayrim qonun hujjatlariga o‘zgartirish va qo‘shimchalar kiritish haqidagi qonun Prezident tomonidan imzolandi, deb xabar beradi Telegram’dagi “Huquqiy axborot” kanali.
Qonunga muvofiq, ayrim litsenziyalanadigan faoliyat turlari bilan ruxsatnoma va xabardor qilish orqali shug‘ullanishga ruxsat berilgani munosabati bilan bir qator qonunlarda litsenziya talabi bekor qilingan.
Shunga ko‘ra, Jinoyat kodeksiga xabardor qilish yoki ruxsat etish xususiyatiga ega hujjatni olish talab etiladigan faoliyat bilan xabarnoma yubormasdan yoki ruxsat etish xususiyatiga ega hujjatsiz shug‘ullanish juda ko‘p miqdorda daromad olish bilan bog‘liq bo‘lganida jinoiy javobgarlikka sabab bo‘lishiga oid javobgarlik kiritilgan.
Ma’muriy javobgarlik to‘g‘risidagi kodeksida ham mazkur harakatlar uchun javobgarlik choralari belgilangan.
“Dori vositalari va farmatsevtika faoliyati to‘g‘risida”gi qonunda farmatsevtika faoliyatining quyidagi yo‘nalishlariga litsenziya olish talab qilinmasligi belgilandi:
- tibbiy buyumlarni ishlab chiqarish, tayyorlash, ulgurji realizatsiya qilish;
- dori vositalari va tibbiy buyumlarni yaratish bo‘yicha ilmiy-tadqiqot ishlari;
- dori vositalari va tibbiy buyumlar sifatini nazorat qilish;
- dorivor o‘simlik xomashyosini qadoqlash va ulgurji sotish.
Izoh (0)