13-oktabr kuni Turkiya hukumati tomonidan O‘zbekistonga beg‘araz yordam sifatida COVID-19 ga qarshi Xitoyda ishlab chiqarilgan Sinovac vaksinasi olib kelindi, deb xabar beradi SSV matbuot xizmati.
Ma’lum qilinishicha, Istanbul–Toshkent reysi bilan mamlakatga keltirgan Sinovac vaksinasining 200 ming dozasi, shuningdek, 20 ming quti “Favipiravir” dori preparati O‘zbekiston vakillari tomonidan qabul qilib olingan.
O‘zbekiston va Turkiya hukumatlari o‘rtasida sog‘liqni saqlash sohasida grant yordamiga oid imzolangan bitim asosida olib kelingan Sinovac vaksinasi mamlakatga keltirilgan oltinchi vaksinadir.
Shunday qilib, O‘zbekistonga emlash jarayonlarida foydalanilayotgan jami vaksina 28 673 528 dozani tashkil qilmoqda.
Eslatib o‘tamiz, O‘zbekistonga Xitoyning koronavirusga qarshi Sinovac vaksinasi keltirilishi mumkinligi haqida 2021-yilning may oyida Koronavirusga qarshi kurash shtabi a’zosi Nurmat Otabekov ma’lum qilgandi. “Jahon sog‘liqni saqlash tashkilotining ma’lumotlariga ko‘ra, COVAX dasturi doirasida Xitoyning ‘Sinofarm’ firmasida ishlab chiqarilgan vaksina — Sinovac vaksinasi O‘zbekistonga olib kelinishi ehtimoli bor”, — degan edi u AOKAda o‘tkazilgan brifingda.
Bundan avval O‘zbekistonga 1,2 million dozadan ortiq Pfizer vaksinasi, Germaniyadan 356 ming doza AstraZeneca vaksinasi hamda 2,5 million doza o‘zbek-xitoy vaksinasi keltirilgani haqida xabar berilgandi.
Izoh (0)