«Лицензиялаш, рухсат бериш ва хабардор қилиш тартиб-таомиллари тўғрисида»ги қонун қабул қилингани муносабати билан Ўзбекистоннинг айрим қонун ҳужжатларига ўзгартириш ва қўшимчалар киритиш ҳақидаги қонун Президент томонидан имзоланди, деб хабар беради Telegram’даги «Ҳуқуқий ахборот» канали.
Қонунга мувофиқ, айрим лицензияланадиган фаолият турлари билан рухсатнома ва хабардор қилиш орқали шуғулланишга рухсат берилгани муносабати билан бир қатор қонунларда лицензия талаби бекор қилинган.
Шунга кўра, Жиноят кодексига хабардор қилиш ёки рухсат этиш хусусиятига эга ҳужжатни олиш талаб этиладиган фаолият билан хабарнома юбормасдан ёки рухсат этиш хусусиятига эга ҳужжатсиз шуғулланиш жуда кўп миқдорда даромад олиш билан боғлиқ бўлганида жиноий жавобгарликка сабаб бўлишига оид жавобгарлик киритилган.
Маъмурий жавобгарлик тўғрисидаги кодексида ҳам мазкур ҳаракатлар учун жавобгарлик чоралари белгиланган.
«Дори воситалари ва фармацевтика фаолияти тўғрисида»ги қонунда фармацевтика фаолиятининг қуйидаги йўналишларига лицензия олиш талаб қилинмаслиги белгиланди:
- тиббий буюмларни ишлаб чиқариш, тайёрлаш, улгуржи реализация қилиш;
- дори воситалари ва тиббий буюмларни яратиш бўйича илмий-тадқиқот ишлари;
- дори воситалари ва тиббий буюмлар сифатини назорат қилиш;
- доривор ўсимлик хом ашёсини қадоқлаш ва улгуржи сотиш.
Изоҳ (0)