2021-yilning iyunida Samarqandning Urgut tumanida erkak boshqa shaxsni bir necha marotaba mix tiqib o‘ldirgani to‘g‘risida xabar berilgandi. Zo‘r TV telekanalining “Bu kun” informatsion dasturida ma’lum qilinishicha, Jinoyat ishlari bo‘yicha Urgut tuman sudida ushbu shaxsga nisbatan sud hukmi o‘qilgan.
Ayblanuvchining so‘zlariga ko‘ra, u mart oyidan beri ustachilik bilan shug‘ullanib kelgani sabab mahalla markaziga chiqmagan. 5-iyun kuni mahalladagi to‘yxona oldiga ovqatlanishga chiqqan.
“Ovqat tayyor bo‘lguncha ichib turaman deb 1,5 litrli pivo buyurdim. Pivoni yarim bokal ichgan edim O‘.O. aka kirib keldi. Mast holatda edi. Sassiqligidan ishtaham bo‘g‘ilmasin deb, unga ket dedim. 100 gramm aroq olib bersang ketaman, dedi. Olib berdim. Hech qayerga qaramasdan chiqib ketdi”, — deydi u.
Uning aytishicha, oradan 15 daqiqalardan keyin O‘.O. yana kelib, aroq so‘ragan va yana spirtli ichimlik ichib ketgan.
“Karvonsaroy tomon ketayotganimda bu odam yana paydo bo‘ldi. Yelkamdan tutib, mana spirt magazin, bitta aroq olib ber, dedi. Unga aroq olib bermasligimni aytganimda onamdan so‘kdi. 100 metrlar yurganimdan keyin onamdan, singlimda, hatto qizimdan so‘ka boshladi. Bunga chidab tura olmay qo‘lim bilan urdim. Keyin yoqasidan ushlab turtib yubordim. Yiqitib, qo‘lim bilan urdim, tepdim. Undan keyingi voqealarni eslay olmayman”, — deydi u.
Bosh prokuratura matbuot kotibi Hayot Shamsutdinovning iyun oyida “Daryo” so‘roviga asosan ayblanuvchi shu atrofda joylashgan xo‘jalik mollari sotish uchun mo‘ljallangan savdo do‘koniga kirib, 15 santimetr uzunlikdagi o‘tkir tig‘li mixni olib chiqqan va O‘.O.ning o‘ng ko‘krak qismiga bir marotaba sanchib olganini ma’lum qilgandi.
Sud hukmiga ko‘ra, ayblanuvchi Jinoyat kodeksining 97-moddasining (qasddan odam o‘ldirish) 2-qismi bilan aybdor deb topilib, 18 yil muddatga ozodlikdan mahrum qilingan.
Avvalroq Samarqandda er yarashish taklifini rad etgani uchun xotini va uning akasini pichoqlagani, Farg‘onada 36 yoshli mast erkak janjal oqibatida tanishini urib, o‘ldirib qo‘ygani to‘g‘risida xabar berilgandi.
Izoh (0)