2021 йилнинг июнида Самарқанднинг Ургут туманида эркак бошқа шахсни бир неча маротаба мих тиқиб ўлдиргани тўғрисида хабар берилганди. Zo‘r TV телеканалининг «Бу кун» информацион дастурида маълум қилинишича, Жиноят ишлари бўйича Ургут туман судида ушбу шахсга нисбатан суд ҳукми ўқилган.
Айбланувчининг сўзларига кўра, у март ойидан бери устачилик билан шуғулланиб келгани сабаб маҳалла марказига чиқмаган. 5 июнь куни маҳалладаги тўйхона олдига овқатланишга чиққан.
«Овқат тайёр бўлгунча ичиб тураман деб 1,5 литрли пиво буюрдим. Пивони ярим бокал ичган эдим Ў.О. ака кириб келди. Маст ҳолатда эди. Сассиқлигидан иштаҳам бўғилмасин деб, унга кет дедим. 100 грамм ароқ олиб берсанг кетаман, деди. Олиб бердим. Ҳеч қаерга қарамасдан чиқиб кетди», — дейди у.
Унинг айтишича, орадан 15 дақиқалардан кейин Ў.О. яна келиб, ароқ сўраган ва яна спиртли ичимлик ичиб кетган.
«Карвонсарой томон кетаётганимда бу одам яна пайдо бўлди. Елкамдан тутиб, мана спирт магазин, битта ароқ олиб бер, деди. Унга ароқ олиб бермаслигимни айтганимда онамдан сўкди. 100 метрлар юрганимдан кейин онамдан, синглимда, ҳатто қизимдан сўка бошлади. Бунга чидаб тура олмай қўлим билан урдим. Кейин ёқасидан ушлаб туртиб юбордим. Йиқитиб, қўлим билан урдим, тепдим. Ундан кейинги воқеаларни эслай олмайман», — дейди у.
Бош прокуратура матбуот котиби Ҳаёт Шамсутдиновнинг июнь ойида «Дарё» сўровига асосан айбланувчи шу атрофда жойлашган хўжалик моллари сотиш учун мўлжалланган савдо дўконига кириб, 15 сантиметр узунликдаги ўткир тиғли михни олиб чиққан ва Ў.О.нинг ўнг кўкрак қисмига бир маротаба санчиб олганини маълум қилганди.
Суд ҳукмига кўра, айбланувчи Жиноят кодексининг 97-моддасининг (қасддан одам ўлдириш) 2-қисми билан айбдор деб топилиб, 18 йил муддатга озодликдан маҳрум қилинган.
Аввалроқ Самарқандда эр ярашиш таклифини рад этгани учун хотини ва унинг акасини пичоқлагани, Фарғонада 36 ёшли маст эркак жанжал оқибатида танишини уриб, ўлдириб қўйгани тўғрисида хабар берилганди.
Изоҳ (0)