Jurabek Laboratories MChJ qo‘shma korxonasida ishlab chiqarilayotgan “Sputnik V” vaksinasi 1- va 2- komponentlarining dastlabki 260 500 dozasi Sanitariya-epidemiologik osoyishtalik va jamoat salomatligi xizmatiga topshirildi, deb xabar beradi SSV matbuot xizmati.
Bu O‘zbekistonda tayyorlanayotgan ikkinchi vaksina bo‘lib, bundan avval ushbu korxonada jami 7 million doza ZF-UZ-VAC2001 vaksinasi ishlab chiqarilgan va uning 1 458 820 dozasi emlash uchun topshirilgan.
Shunday qilib, mamlakatda emlash jarayonlarida foydalanilayotgan jami vaksina 28 473 528 dozani tashkil qilmoqda. Ulardan:
- 1 594 480 dozasi AstraZeneca,
- 21 958 488 million dozasi ZF-UZ-VAC2001,
- 720 500 dozasi “Sputnik V”,
- 3 000 060 dozasi Moderna,
- 1 200 000 dozasi Pfizer/BioNTech vaksinasidir.
Eslatib o‘tamiz, may oyida Rossiyaning “Sputnik V” vaksinasini O‘zbekistonda ishlab chiqarishni yo‘lga qo‘yish bo‘yicha kelishuvga erishilgani ma’lum qilingan edi. O‘zbekiston tomoni bunday taklif bilan 2020-yilning dekabridayoq chiqqan va ishlab chiqarish maydonchasi sifatida Tashkent Pharma Park hududini taklif qilgandi.
Rossiya Xavfsizlik kengashi kotibi o‘rinbosari Rashid Nurgaliyev 26-iyul kuni “Rossiyskaya gazeta”ga bergan intervyusida O‘zbekiston yaqin orada Rossiyaning “Sputnik V” vaksinasini ishlab chiqarishni yo‘lga qo‘yishni rejalashtirayotganini ma’lum qilgandi. O‘zbekiston dori vositasi ishlab chiqariladigan hududni ham tanlaganini ham aytgandi.
Avgust oyi oxirida O‘zbekiston hukumati Jurabek Laboratories kompaniyasida ishlab chiqarilgan ZF-UZ-VAC2001 va “Sputnik V” vaksinalarini davlat ro‘yxatidan o‘tkazishga ruxsat bergan edi. Sentabr o‘rtalarida esa O‘zbekistonda ishlab chiqarilgan “Sputnik V” vaksinasi oktabr oyida ichki bozorga chiqarilishi ma’lum bo‘lgandi.
“Vaksinani quyish allaqachon boshlangan. Biz har bir seriyani tekshiruvdan o‘tkazish uchun Rossiyaga yuboramiz. Tahlillar taxminan uch hafta davom etadi. Rossiyada va (mahalliy) davlat markaziy laboratoriyasida parallel nazorat mavjud. Javoblar chiqishi bilan biz (vaksinani Sog‘liqni saqlash vazirligiga) jo‘natishimiz mumkin bo‘ladi”, — degan edi Jurabek Laboratories’ning marketing va sotish bo‘limi boshlig‘i Aziz Soipov.
Izoh (0)