O‘zbekistonning amaldagi prezidenti, O‘zLiDePdan prezidentlikka nomzod Shavkat Mirziyoyev 11-oktabr kuni qashqadaryolik saylovchilar bilan bo‘lib o‘tgan uchrashuvda Afg‘oniston chegarasidagi vaziyatga ham to‘xtalib o‘tgan. Bu haqda Telegram’dagi “Mikrofon ko‘targan ayol” kanali xabar berdi.
“Ertalab turib O‘zbekiston-Afg‘oniston chegaralarida nima bo‘ldi, deb so‘rayman. 30-40 daqiqa menga chegaralarimizdagi vaziyat haqida xabar berishadi. Yangi rahbarlar bilan muzokara olib boryapmiz. O‘tiraversak, vaziyatni bizga hech kim aytmaydi. Jafokash afg‘on xalqiga qo‘limizdan kelgancha yordam berishga tayyormiz.
Bizning yagona maqsadimiz — O‘zbekistonga Afg‘onistondan o‘q otilmasin. Men lavozimga kelganimda 57 foiz chegaramizda muammolar bor edi. Qo‘shni mamlakatlar bilan muzokaralar yordamida ularning aksariyatini hal qildik”, — deydi Shavkat Mirziyoyev.
Avvalroq Afg‘oniston muvaqqat hukumati a’zolari O‘zbekiston Prezidentiga afg‘on xalqining orzu-intilishlariga qaratayotgan ulkan e’tibori, oziq-ovqat inqirozining oldini olishda ko‘rsatgan yordami uchun samimiy minnatdorlik bildirgandi. “Tolibon” rasmiysi O‘zbekiston tashqi ishlar vaziri Abdulaziz Komilov bilan o‘tkazilgan muzokaralar davomida O‘zbekiston xavfsizligiga Afg‘oniston hech qanday tahdid bo‘lmasligi ham aytib o‘tgan.
Eslatib o‘tamiz, Prezident Shavkat Mirziyoyev 27-avgust kuni Navoiy viloyatiga tashrifi doirasida Afg‘onistondagi vaziyat, “Tolibon” bilan olib borilayotgan muloqot haqida ham to‘xtalib o‘tgandi. “Menga xalqimning tinchligi kerak, osoyishtaligi kerak. Faqat va faqat o‘zbek xalqimning, jonajon O‘zbekistonning tinchligiga ta’sir ko‘rsatadigan omil bo‘lsa, kim bo‘lishidan qat’i nazar, muloqotga kirishishga tayyorman”, — degan edi o‘shanda Prezident.
Izoh (0)