Samarqand xalqaro aeroporti 2021-yil 20-oktabrdan 20-noyabrgacha yangi aerodrom majmuasini ishga tushirishga tayyorgarlik ishlari munosabati bilan parvozlarni vaqtincha to‘xtatadi. Bu haqda Uzbekistan Airports xabar qildi.
Barcha reyslar respublikaning boshqa xalqaro aeroportlari — Navoiy, Buxoro, Qarshiga yo‘naltiriladi, u yerdan yo‘lovchilar uchun Samarqandga yerusti transferi tashkil etiladi.
Qayd etilishicha, ayni paytda uzunligi 3105 metr va kengligi 60 metr bo‘lgan yangi uchish-qo‘nish yo‘lagining qurilishi to‘liq yakunlangan.
Bir oy ichida yangi uchish-qo‘nish yo‘lagi va perron bilan bog‘lash bo‘yicha ishlar olib borilishi kerak.
Qayd etilishicha, 2022-yilda ShHT sammitiga tayyorgarlik doirasida Samarqandda yangi aerodrom majmuasi qurilishi davom etmoqda.
Bundan avval Samarqand aeroporti boshqaruvini Air Marakanda kompaniyasiga berish rejalashtirilayotgani hamda Samarqand xalqaro aeroportiga yangi direktor tayinlangani haqida xabar berilgandi.
Izoh (0)