AOKAda o‘tkazilgan brifingda Adliya vazirligi axborot xizmati rahbari Sevara O‘rinboyeva hokimiyat vakiliga qarshilik ko‘rsatganlik uchun javobgarlikning kuchaytirilishi to‘g‘risidagi qonun yuzasidan ma’lumot berdi.
Avvalroq Jinoyat kodeksi va Ma’muriy javobgarlik to‘g‘risidagi kodeksga o‘zgartirishlar kiritishni nazarda tutuvchi qonun Prezident tomonidan imzolangani to‘g‘risida xabar berilgandi. Kiritilgan o‘zgartirishlarga ko‘ra, hokimiyat vakiliga yoki fuqaroviy burchini bajarayotgan shaxsga qarshilik uchun jinoiy javobgarlik kuchaytirilgan.
Sevara O‘rinboyevaning so‘zlariga ko‘ra, O‘zbekistonda so‘nggi yillarda hokimiyat vakiliga nisbatan faol qarshilik ko‘rsatish jinoyatlarining soni oshgan, jumladan, 2019-yilda — 243 tani, 2020-yilda esa 251 tani tashkil etgan. Shuningdek, huquqni muhofaza qiluvchi organ xodimlariga tajovuz kayfiyati ham ortib, 2018-yilda 24,1 ming holat sodir etilgan bo‘lsa, 2020-yilda 39 ming holatni tashkil qilmoqda.
Ta’kidlanishicha, oxirgi vaqtlarda ichki ishlar organlari xodimining qonuniy talablarini bajarmaslik holatlari ham sezilarli daraja oshib bormoqda. IIO xodimlarining qonuniy talablariga quyidagilar kiradi:
- huquqbuzarlikni to‘xtatish;
- hujjatlarni tekshirish uchun taqdim etish;
- ichki ishlar organlariga borish yoki ko‘rsatilgan muddatda ichki ishlar organlarida bo‘lish;
- transport vositasini to‘xtatish;
- jabrlanuvchilarga yordam ko‘rsatish va o‘z xizmat vazifasida belgilab qo‘yilgan boshqa talablar.
Mavzuga doir: “Hukumat ixcham bo‘lishi kerak” — Ruslanbek Davletov
Izoh (0)