Shavkat Mirziyoyev Gulistonning eski dehqon bozori o‘rnida Guliston City qurishni taklif qildi

Prezident Shavkat Mirziyoyev Sirdaryo viloyatiga tashrifi chog‘ida Guliston shahrining eski dehqon bozori o‘rnidagi 42 gektar maydonda Guliston City barpo etishni taklif qildi. Bu haqda O‘zLiDeP axborot xizmati xabar berdi.

Ma’lum qilinishicha, bu yerda 1 ming 700 xonadonli 16 qavatli turar joylar, umumta’lim va biznes maktablari, 2 ta bolalar bog‘chasi, zamonaviy klinika, madaniyat markazi va mehmonxona quriladi.

Davlat rahbarining so‘zlariga ko‘ra, Sirdaryoda kelgusi besh yilda markazlashgan ichimlik suvi bilan ta’minlash darajasi 82 foizdan 90 foizga, kanalizatsiya qamrovi 14 foizdan 40 foizga yetkaziladi. Buning uchun 1,8 trillion so‘m evaziga, 428 kilometr ichimlik suv va 57 kilometr kanalizatsiya tarmog‘i, 118 ta suv va 7 ta kanalizatsiya inshootlari barpo etiladi. Natijada 60 ming nafar aholi ilk bor suv bilan ta’minlanadi, 106 ming nafar aholining suv ta’minoti yaxshilanadi.

Shuningdek, “Obod qishloq” va Obod mahalla” dasturlari doirasida kelgusi besh yilda 110 ta qishloq va mahallada obodonlashtirish, ijtimoiy obyektlar, ichki yo‘llar va infratuzilmani ta’mirlashga 1 trillion so‘mdan ziyod mablag‘ ajratiladi. Bundan tashqari, keyingi uch yilda viloyatdagi 17 ta qishloq infratuzilmasini yaxshilash va rivojlantirishga 10 million dollar yo‘naltiriladi.

Viloyatda elektr energiyasi ta’minotini yaxshilash maqsadida, kelgusi besh yilda 5 ming kilometr past va yuqori kuchlanishli tarmoqlar, 1 ming 100 ta transformator yangidan quriladi va rekonstruksiya qilinadi. Bu ishlar hisobiga 420 mingdan ortiq aholi yashaydigan maskanlar obod qilinadi.

Avvalroq Shavkat Mirziyoyev Sirdaryo Mega Luks qo‘shma korxonasi faoliyati bilan tanishgani to‘g‘risida xabar berilgandi.