Tehron Ozarbayjon tomonidan xorijiy davlatlar ishtirokida o‘tkazilgan harbiy mashg‘ulotlarni provokatsiya deb hisoblaydi. Bu haqda Eron tashqi ishlar vaziri Husayn Amir Abdullohiyanga tayanib, “Interfaks” xabar berdi.
“Ozarbayjon muntazam ravishda turli mamlakatlar bilan oltita mashg‘ulot o‘tkazdi, garchi ular har bir mamlakatning qaroriga bog‘liq bo‘lsa-da, shubhasiz, bu provokatsion harakatdir,” — dedi u 6-oktabr kuni Moskvada Rossiya tashqi ishlar vaziri Sergey Lavrov bilan muzokaralar yakunlari bo‘yicha o‘tkazilgan matbuot anjumanida.
Eron vazirining so‘zlariga ko‘ra, ushbu mashg‘ulotlarni faollashtirish “mintaqada yaxshi gumon uyg‘otmaydi”.
“Eron yaqinda bir nechta mashg‘ulotlar o‘tkazdi, lekin diplomatik kanallar orqali biz bu haqda mintaqadagi barcha davlatlarga xabar berdik”, — dedi Eron diplomatik idora rahbari. Uning qo‘shimcha qilishicha, ushbu mashqlarning mohiyati “mintaqadagi tinchlik, barqarorlik va xavfsizlik xabaridan boshqa narsa emasdi”.
O‘z navbatida Rossiya tashqi ishlar vaziri Sergey Lavrov shunday dedi: “Biz bu yerda harbiy faollikni kuchaytirishga, har qanday mashg‘ulotlar provokatsion xususiyatga ega bo‘lishiga qarshimiz. Xuddi shu Ozarbayjonning o‘zi chegarada eronlik do‘stlarimiz yaqinda o‘tkazgan mashg‘ulotlar tufayli xavotir bildirgan edi”.
“Kaspiy masalasi va chet davlatlarning Kaspiy mintaqasi ishlariga aralashish uchun zamin tayyorlayotganiga kelsak, biz do‘stlarimizga Kaspiy dengizining huquqiy maqomi to‘g‘risidagi konvensiya kuchga kirishini ta’minlash zarurligini bir necha bor ta’kidladik. Bu hujjat Kaspiy dengizida ushbu mintaqaga kirmaydigan har qanday davlat harbiy kuchlarining bo‘lishini qat’iy taqiqlaydi”, — dedi Rossiya vaziri.
U konvensiya oxirgi ratifikatsiya yorlig‘i olgandan keyin kuchga kirishini eslatib o‘tdi.
“Hozir bu masala Eron parlamentida ko‘rib chiqilmoqda. Umid qilamanki, ratifikatsiya to‘g‘risidagi qaror tezda qabul qilinadi, shunda konvensiya Kaspiy dengizida tegishli tartibni ta’minlaydigan xalqaro huquqiy hujjatga aylanadi”, — dedi Lavrov.
Izoh (0)