Londonda 6-oktabrga o‘tar kechasi kuchli yomg‘ir yog‘ib, oqibatda suv toshqini yuz berdi va bir nechta metro liniyalari yopildi.
itvNEWS nashrining yozishicha, Londonning nufuzli tumani hisoblangan Naytsbrij, ayniqsa, katta zarar ko‘rgan. Avtomobillar va jamoat transportlari suv kechib harakatlanishga majbur bo‘lgan. Suv toshqini tufayli bir qancha avtomobil yo‘llari yopilgan.
Meteorologlarning ma’lumotlariga ko‘ra, London tumanlaridan biriga bir soat ichida 26 millimetr yog‘ingarchilik tushgan.
Shu hafta boshida Italiyada ob-havo keskin yomonlashib, kuchli yomg‘ir, momaqaldiroq va qattiq shamol boshlangandi. Mamlakatning Fuqarolik mudofaa xizmati qaroriga binoan, uchta shimoliy viloyat — Liguriya, Lombardiya va Pyemontning bir qator tumanlarida meteorologik xavfning “qizil” (eng yomon) darajasi e’lon qilindi. 4-oktabr kuni Liguriyaning Savona provinsiyasiga, shuningdek, Genuya yaqiniga rekord darajadagi yog‘ingarchilik (taxminan, 500 mm) tushgan, buning oqibatida kichik daryolar qirg‘oqlaridan toshib ketib, bir necha aholi punktlarini suv bosgan.
Shuningdek, Ummon va Eronga kuchli “Shohin” tropik sikloni urilib, 13 kishi tabiiy ofat qurboniga aylangani haqida xabar berilgandi. Qayd etilishicha, Ummonning shimoliy qirg‘og‘ida keng ko‘lamli suv toshqini sodir bo‘lgan. Kuchli yomg‘ir yog‘ib, shamol tezligi soatiga 150 kilometrgacha yetgan. Shimoliy al-Batina provinsiyasida 7 kishi halok bo‘lgan, yana to‘rt kishi ko‘chkilar oqibatida cho‘kib ketgan yoki halok bo‘lgan. Eronda ikki baliqchining jasadi topilgan. Yana uch nafar baliqchi bedarak yo‘qolgan.
Mavzuga doir:
Izoh (0)