Jinoyat ishlari bo‘yicha Mirzo Ulug‘bek tumani sudida o‘z bolasini sotgan onaga nisbatan hukm o‘qildi. Bu haqda “Yoshlar” telekanalining “Yangi davr” informatsion dasturida ma’lum qilindi.
Ma’lum qilinishicha, sudlanuvchi 1998-yili Namangan viloyatida tug‘ilgan. Turmushga chiqmagan. 2020-yilda Toshkentga ishlash uchun keladi va o‘sha yilning noyabr oyida homilador bo‘lib qoladi. 2021-yilning iyul oyi boshlarida ijarada birga yashab turgan tanishi undan tug‘ilajak bolasini o‘ziga berishini so‘raydi. U buning uchun pul taklif qilgan.
Sudlanuvchi 19-avgust kuni dugonasi bilan oldindan til biriktirib, o‘zining uch kunlik farzandini sotish va buning orqasidan moddiy boylik orttirish rejasini tuzgan. U chaqalog‘ini 9 ming dollarga sotayotgan vaqtida departamentning Toshkent shahar Mirzo Ulug‘bek tumani va DXX xodimlari tomonidan o‘tkazilgan tadbirda ashyoviy dalillar bilan ushlangan.
“Birga yashab kelgan opa bolamni sotishimni so‘radi. Men sotmasligimni, bola o‘zimizga ham kerakligini aytdim. Shunda u o‘zining eriga bolani sotishimni aytib, undan pul undirishimizga undadi”, — deydi sudlanuvchi.
Sud hukmiga ko‘ra, ayol Jinoyat kodeksining 135-moddasi (odam savdosi) 3-qismi “a” bandi bilan aybdor deb topilgan va unga 6 yilga ozodlikdan mahrum qilish jazosi tayinlangan. Ayolning farzandi esa vasiylik organlariga topshirilgan.
Avvalroq Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani, Navoiyda farzandini 85 million so‘mga sotishga uringan er-xotin jinoyat ustida ushlangani to‘g‘risida xabar berilgandi.
Izoh (0)